Fələstinin Rabitə və Rəqəmsal İqtisadiyyat Nazirliyinin müavini Huda əl-Vahidi bildirib ki, İsrailin Qəzza zolağına qarşı təcavüzü rabitə sektoruna genişmiqyaslı dağıntılar vurub və onun təxminən 74%-ni məhv edib, nəticədə rəqəmsal infrastrukturda misli görünməmiş bir böhran yaranıb.
Cenevrədə keçirilən Beynəlxalq Telekommunikasiya İttifaqının İdarə Heyətinin iclasında çıxış edən əl-Vahidi qeyd edib ki, 580 mobil qüllənin və əsas fiberoptik şəbəkələrin dağıdılması nəticəsində sektorun çəkdiyi birbaşa zərər təxminən 164 milyon dollar təşkil edir.
Rabitə Nazirliyinin bəyanatında əlavə olunub ki, genişmiqyaslı dağıntı və infrastrukturun yenidən qurulması zərurəti fonunda, qarşıdakı beş ildə gözlənilən iqtisadi itkilər 736 milyon dollara çata bilər.
Əl-Vahidi Qəzzada rəqəmsal infrastrukturun vəziyyətinin daha da pisləşməsinin qarşısını almağa çağırıb, İsrailin bombalı hücumları nəticəsində rabitə xidmətlərinin geniş kəsilməsinin davam etdiyini vurğulayıb və 2024-cü ildə qəbul olunmuş 1424 saylı BMT qətnaməsinin – Fələstinin rabitə sektorunun bərpasına dair – icrası üçün heç bir real addımın atılmadığını bildirib.
O, İttifaqın idarə heyətini qətnamənin icrası üçün təcili icra planı hazırlamağa çağırıb və işğalçının rabitə infrastrukturunu demək olar ki, tamamilə məhv etməsindən sonra rəqəmsal infrastrukturu hədəfdən qorumağı tələb edib.
Qərb Sahilində isə əl-Vahidi İsrailin hərbi reydlərinin və blokadalarının təxminən 215,4 milyon dollar dəyərində itkilərə səbəb olduğunu, üstəlik, qanunsuz şəkildə genişlənən İsrail şəbəkələrinin fələstinlilərin inkişaf və genişləndirmə layihələrini iflic etdiyini qeyd edib.
Beynəlxalq Telekommunikasiya İttifaqının idarə heyəti bir ay ərzində icra planı hazırlamağı, hər altı aydan bir irəliləyiş hesabatı təqdim etməyi, beynəlxalq donor konfransı keçirməyi, Fələstin üçün xüsusi maliyyə dəstək fondu yaratmağı və rabitə sektorunu əsas humanitar xidmət kimi təsnif etməyi qərara alıb.
İttifaq həmçinin Fələstinin tezlik spektrinə çıxış imkanını təmin etməyi, 4G və 5G texnologiyalarının təqdim olunmasını, rabitə və elektrik stansiyalarının yanacaq və avadanlıqla təmin edilməsini, texniki heyətin qorunmasını – çünki təcavüz zamanı 150-dən çox texnik həlak olub – tövsiyə edib.
Xatırladaq ki, 7 oktyabr 2023-cü ildən etibarən, fələstinli rabitə şirkətləri Qəzzada İsrailin bombardmanı və mühasirəsi nəticəsində, yanacaq tükəndiyi üçün geniş kəsintilər barədə davamlı olaraq məlumat yayır.
Əlaqədar xəbərlər
