Müxtəlif ölkələrdən olan yüzlərlə tanınmış yəhudi ravvin görünməmiş bir addım ataraq Qəzzədə davam edən humanitar böhrana qarşı səslərini ucaltmaqla İsrail rejiminin Nazirlər Kabinetinə ünvanlanmış açıq məktub imzalayıb.
Dünyanın müxtəlif yerlərindən müxtəlif dini cərəyanlara bağlı olan yüzlərlə yəhudi ravvin açıq məktub imzalayaraq, sionist hökuməti Qəzzə zolağında aclıq və qıtlıqdan müharibə silahı kimi istifadə etməyi dayandırmağa çağırıb.
“Times of Israel” qəzetinin yazdığına görə, “qeyri-adi məktubda” deyilir ki, “yəhudi xalqı ciddi mənəvi böhranla üz-üzədir” və “qadınlar, uşaqlar və qocalar da daxil olmaqla, dinc əhalinin öldürülməsi, aclığın müharibə vasitəsi kimi istifadə edilməsi” qarşısında susmamalıdır.
Bu ravvinlər, həmçinin humanitar yardımın azaldılmasını, insanların yeməkdən, sudan və dərmandan məhrum edilməsini fundamental yəhudi dəyərlərinə zidd hesab ediblər və Benyamin Netanyahu hökumətini humanitar yardımın beynəlxalq nəzarət altında geniş miqyasda daxil olmasına, bütün mümkün vasitələrlə girovları azad etməyə və Qərb Sahilindəki “zorakı və cinayətkar” hərəkətlərinə son qoymağa çağırıblar.
Nəhayət, israillilərin təhlükəsizliyini, fələstinlilərin ləyaqətini və ümidini, regionun dinc gələcəyini təmin edəcək dialoqun zəruriliyi vurğulanıb.