Birləşmiş Millətlər Təşkilatının Fələstin Qaçqınlarına Yardım və İşlə təminat Agentliyi (UNRWA) bəyanatında Qəzzə zolağındakı aclıq vəziyyətinin faciəvi olduğunu xəbərdar edib və bəzi sakinlərin şiddətli aclıq səbəbindən küçələrdə huşunu itirdiyini açıqlayıb.
UNRWA rəsmi Facebook səhifəsində verdiyi bəyanatda yazıb: Qəzzə sakinləri tamamilə ərzaq və dərman qıtlığı ilə üzləşiblər və mövcud humanitar yardımların paylanma şəraiti aclıqdan əziyyət çəkən, qorxmuş, yaralanmış və yorğun ailələrin insan ləyaqətini tapdalayır və onları alçaldır.
Beynəlxalq təşkilat fələstinli ailələrin köməyə çox ehtiyacı olduğunu qeyd edərək əlavə edib: Bəzi hallarda fələstinlilər işğalçı rejimin girməyə icazə verdiyi cüzi ərzaq payını almağa çalışarkən onlara atəş açılıb və ya yük maşınları onların üzərinə sürülüb.
UNRWA sonda Qəzzəyə qarşı blokadanın dərhal aradan qaldırılmasının vacibliyini vurğulayaraq, qida əldə etməyə çalışan fələstinlilərin öldürülməsi və yaralanması ilə bağlı dərhal araşdırma aparılmasına çağırıb.
BMT-nin İnsan Haqları Ofisi daha əvvəl Qəzzədə Qəzzə Humanitar Fondunun (GHF) yardım məntəqələrində və humanitar karvanların yaxınlığında ən azı 613 mülki qətl hadisəsini sənədləşdirdiyini açıqlamışdı.
Ofisin sözçüsü Ravina Şamdasani Cenevrədə jurnalistlərə bildirib: İyunun 27-nə kimi Qəzzə Humanitar Vəqfinin yardım məntəqələrində və humanitar konvoyların yaxınlığında 613 qətl qeydə alınıb. Bu, 27 iyun tarixinə olan rəqəmdir. O vaxtdan bəri daha çox insident baş verib.