Uşaqlar üçün ən böyük beynəlxalq təşkilatın sözçüsü cümə axşamı Qəzzə zolağında hökm sürən şəraitlə bağlı şok statistika təqdim edib və beynəlxalq ictimaiyyətdən kömək istəyib.
“Qəzzə zolağında vəziyyət təhlükəlidir və biz uçurumun kənarındayıq”. Bunu UNİCEF-in (Birləşmiş Millətlər Təşkilatının Uşaq Fondu) Fələstin üzrə sözçüsü Kazem Əbu Xələf müsahibəsində deyib.
Bu sözlər Qəzzə zolağına qarşı təcavüzün bərpasının 31-ci günündə işğalçılar Qəzzə zolağında 23-dən çox fələstinlini şəhid edən yeni qırğın qeydə alınarkən deyilib.
Aprelin 17-si səhər saatlarında işğalçıların Xan Yunisin Mavasi bölgəsində qaçqınların çadırlarını bombalaması nəticəsində 15-dən çox fələstinli, o cümlədən bir ailənin 10 üzvü – əksəriyyəti qadın və uşaq – yanaraq şəhid olub, bir neçə nəfər isə yaralanıb.
İsrail rejiminin hava hücumu nəticəsində Qəzzə zolağının şimalında yerləşən Beyt Lahiyada qaçqınların yerləşdiyi çadır hədəfə alınıb və bir ailədən 6 fələstinli şəhid olub. Bundan əlavə, Cəbəliya düşərgəsində qaçqınların yerləşdiyi çadıra edilən PUA hücumunda isə başqa bir ailənin 7 üzvü şəhid edilib.
UNICEF sözçüsü sionist rejimin davam edən cinayətləri fonunda Qəzzə zolağında hökm sürən şəraitlə bağlı bildiri: “Müharibə başlayandan bəri Qəzzədə öldürülən uşaqların orta sayı gündə 27-yə çatıb”.
Əbu Xələf əlavə olaraq bildirib ki, beynəlxalq ictimaiyyət Qəzzəyə yardım göndərilməsinə icazə verilməsi üçün təzyiq göstərməlidir. O, deyib: “Qəzzəyə yardımın çatdırılması alver və siyasi sövdələşmələr üçün vasitəyə çevrilməməlidir.”
UNICEF-in sözçüsü Qəzzədə gedən müharibə ilə bağlı son statistikanı təqdim edərək bildirib: “Qəzzədə 39 min uşaq yetim qalıb. Hal-hazırda 16 min nəfərin təcili olaraq Qəzzə zolağından çıxarılmasına ehtiyac var ki, onların 4 mini uşaqdır.”
Bu arada, İsrailin müharibə naziri İsrail Katz yaxın günlərdə vurğulayıb ki, İsrail Qəzzə zolağına humanitar yardımın göndərilməsinə icazə verməyəcək və bu yardımları HƏMAS-a təzyiq vasitəsi kimi görür. HƏMAS isə bu açıqlamaya cavab olaraq, bunu “müharibə cinayətinə açıq etiraf” adlandırıb.
HƏMAS Beynəlxalq Cinayət Məhkəməsinə çağırış edərək işğalçı liderlərin, o cümlədən “terrorçular” adlandırdıqları Netanyahunu, Kətsi və Ben-Qviri bu cinayətlərə görə mühakimə etməyə çağırıb.
İsrailli məhbusların ailələri də Katzın Qəzzə planının sadəcə bir illüziya olduğunu ifadə edərək, yeganə həll yolunun müharibənin sonu olsa belə, razılaşma yolu ilə bütün məhbusların azad edilməsi olduğunu açıqlayıb.