Ümumdünya Səhiyyə Təşkilatı Qəzzədə və İordan çayının qərb sahillərində müalicə və tibb mərkəzlərinin sionist rejiminin amansız hücumlarından amanda olmadıqları və fələstinli uşaqların ölüm təhlükəsinin artması barədə xəbərdarlıq edib.
Xarici KİV-in verdiyi məlumata görə, Ümumdünya Səhiyyə Təşkilatı (ÜST) ötən cümə günü verdiyi hesabatda bildirib ki, Qəzzə müharibəsi başladıqdan bəri Qəzzədə və İordan çayının qərb sahillərindəki xəstəxanalar və digər həyati əhəmiyyətli tibb və müalicə infrastrukturları təxminən 600 dəfə hücuma məruz qalıb.
Ümumdünya Səhiyyə Təşkilatının yeni statistikasına görə, Oktyabrın 7-dən və sionist rejiminin fələstinlilərə qarşı cinayətlərinin yeni dövrəsi başladıqdan etibarən, azı 613 nəfər İsrailin işğal olunmuş ərazilərə hücumu zamanı müalicə mərkəzlərində şəhid olub. Onlardan 606 nəfəri Qəzzədəki müalicə infrastrukturlarında və 7 nəfəri isə İordan çayının qərb sahillərində olub.
ÜST sözçüsü Kristian Lindmayer müharibənin davam etməsini və Qəzzənin bombalanmasını pisləyərək deyib: “Müalicə mərkəzlərinə hücumların davam etməsindən əlavə, humanitar fəzanın azaldılmasının davam etməsi Qəzzə əhalisini çökmə nöqtəsinə aparır.”
Sionist rejiminin Qəzzə zolağına qarşı cinayətləri zamanı şəhid olmuş minlərlə uşaqdan əlavə, Qəzzədə uşaqların həyat şəraiti pisləşməkdədir. Belə ki, Qəzzədəki uşaqlar arasında ishal və qida çatışmazlığı artmaqda davam edir və mütəxəssislər xəbərdarlıq ediblər ki, bu, onlar arasında ölüm təhlükəsi hallarını artırır.
Müalicə mərkəzlərinə olan hücumları işıqlandıran Ümumdünya Səhiyyə Təşkilatnın onlayn platforması bildirib ki, Oktyabrın 7-dən etibarən Qəzzə zolağında 304 hücum baş tutub. Bu hücumlarda 94 müalicə xidmətləri mərkəzi (o cümlədən 36 xəstəxanadan 26-sı) və 79 təcili yardım maşını zərər çəkib.
Digər tərəfdən də, İordan çayının qərb sahillərində qeyd olunan zaman kəsiyində 286 hücum baş tutub. Bu da 7 nəfərin ölümü və 52 nəfərin yaralanması ilə nəticələnib. Həmçinin bu hücumlarda 24 müalicə mərkəzi və 212 təcili yardım maşını zərər çəkib.