Sloveniyanın xarici işlər naziri Tanja Fayon 17 iyul – cümə axşamı – verdiyi açıqlamada bildirdi ki, ölkəsinin hökuməti İsrailin milli təhlükəsizlik naziri İtmar Ben Qvir və maliyyə naziri Betsalel Smotriçi arzuolunmaz şəxs elan edib.
Sloveniya hökuməti hər iki nazirə fələstinlilərə qarşı “soyqırım yönümlü” bəyanatlar verməkdə və zorakılığa təhrik etməkdə ittiham irəli sürüb.
Fayon bildirib ki, Sloveniya bu addımı Avropa İttifaqı xarici işlər nazirlərinin Brüsseldə keçirilən görüşündə İsrailin insan haqlarını pozması ilə bağlı birgə tədbir razılaşdırıla bilmədikdən sonra atıb.
Mətbuat konfransında Fayon deyib: “Bu gün hökumət milli səviyyədə ilk tədbirlərdən birini qəbul etdi – İsrailin iki nazirini Sloveniya Respublikasında arzuolunmaz şəxs elan etdik”.
O əlavə edib: “Bu tədbir Aİ daxilində ilkdir. Yeni bir səhifə açırıq” – deyə o, digər tədbirlərin də hazırlandığını bildirib, lakin detallara varmayıb.
Sloveniya hökumətinin yaydığı bəyanatda qeyd olunub ki, adıçəkilən nazirlər “işğal olunmuş İordan çayının qərb sahilində qeyri-qanuni yəhudi yaşayış məntəqələrinin genişləndirilməsini, fələstinlilərin məcburi şəkildə köçürülməsini açıq şəkildə dəstəkləyir və fələstinli mülki əhaliyə qarşı zorakılığı təşviq edirlər”. Xatırladaq ki, Sloveniya ötən il müstəqil Fələstin dövlətini tanıyıb.
Digər tərəfdən, Beynəlxalq Cinayət Məhkəməsi (BCM) İsrailin işğalçı baş naziri Benyamin Netanyahu və keçmiş müdafiə naziri Yoav Qalanta qarşı verilmiş həbs orderlərinin ləğvini tələb edən İsrailin müraciətini rədd edib.
BCM-nin rəsmi saytında yayımlanan açıqlamaya əsasən, məhkəmə hakimləri həmçinin Fələstində işğalçılıqla bağlı aparılan daha geniş istintaqın dayandırılması barədə İsrailin digər tələbinə də mənfi cavab veriblər.
Qeyd edək ki, BCM ötən ilin noyabrında Netanyahu və Qalant barəsində Qəzzada törədilmiş müharibə cinayətlərinə görə həbs qərarı vermişdi.
İşğalçı rejimin yüksək səviyyəli rəsmiləri isə bu qərarı sərt tənqid edərək, onu Fələstin müqavimətinə verilmiş mükafat, antisemitizmin təzahürü və beynəlxalq ədalətin pozulması kimi qiymətləndirmiş, bəziləri isə buna cavab olaraq İordan çayının qərb sahilində suverenlik elan edilməsini tələb etmişdi.
May ayında İsrail rəsmiləri Haaqadakı BCM-yə rəsmi müraciət edərək, həbs orderlərinin ləğvini istəmiş, və məhkəmənin qərarlarının İsrailin Fələstinlə bağlı mübahisələrdə BCM-nin yurisdiksiyasını tanımadığı halda verildiyini bildirmişdi.
İsrail bu arqumentini 1990-cı illərin əvvəlində Fələstin Muxtariyyəti ilə imzalanmış razılaşmalara əsaslandıraraq BCM-nin bu məsələlər üzrə səlahiyyətinin olmadığını iddia edirdi.
Lakin BCM hakimləri bu arqumentləri rədd edərək bildiriblər ki, verilmiş həbs orderləri qüvvədə qalır və İsrailin müraciəti hələ də baxılma mərhələsindədir. Bu məsələ ilə bağlı yekun qərarın nə vaxt veriləcəyi isə açıqlanmayıb.
Əlaqədar xəbərlər
