Sionist rejiminin Qəzzədə törətdiyi son cinayətlər çərçivəsində, bu rejim Qəzzə xalqını ərzaq blokadasına almaqla yanaşı, 200-dən çox fələstinli uşağı da şəhid edib.
Xarici KİV-in məlumatına görə, cümə axşamı BMT-nin Uşaq Fondunun (UNICEF) sözçüsü Tes İnqram sionist rejimin Qəzzəyə qarşı son hücumları nəticəsində 200-dən çox uşağın şəhid olduğunu bəyan edib.
İnqram verdiyi müsahibədə bu rejimin hücumları səbəbindən Qəzzə sakinlərindən minlərlə insanın davamlı olaraq məcburi köçkün vəziyyətinə düşdüyünü və yerlərini dəyişməyə məcbur olduğunu bildirib.
Qəzzənin Dövlət İnformasiya İdarəsindən cümə axşamı bildirilib ki, sionist rejimin son 72 saat ərzində törətdiyi hücumlar nəticəsində şəhid olanların sayı 591-ə, yaralıların sayı isə 1042-yə çatıb.
Bu qurum qurbanların 70%-nin uşaqlar, qadınlar və yaşlı insanlar olduğunu vurğulayıb. Uşaqlar, qadınlar və yaşlılar arasında şəhidlərin sayının artması, işğalçı rejimin birbaşa mülki vətəndaşları hədəf aldığını açıq şəkildə sübut edir.
Qəzzənin Dövlət İnformasiya İdarəsi vurğulayıb ki, bu vəhşi hücumlar ABŞ-ın dəstəyi və beynəlxalq ictimaiyyətin susqunluğu ilə həyata keçirilən tam miqyaslı soyqırım niyyətini açıq şəkildə göstərir.
Qurum dünya ölkələrini və insan haqları təşkilatlarını işğalçı rejimin cinayətlərini qınamağa və onların dərhal dayandırılması üçün təcili tədbirlər görməyə çağırıb.
İnqram əlavə olaraq bildirib: Bu hücumlarda şəhid olmayan minlərlə uşaq ağır yaralanıb və Qəzzə zolağındakı xəstəxanalar davamlı bombardmanın yaratdığı fəlakətləri aradan qaldırmağa qadir deyil.
UNICEF sözçüsü, həmçinin Qəzzə sakinlərinin ərzaq blokadasının ağır təsirlərindən əziyyət çəkdiyini vurğulayaraq bildirib ki, əsas ərzaq məhsullarının qiyməti kəskin şəkildə artıb və Qəzzə əhalisi artıq bu vəziyyətə dözə bilmir.