Suriyalı mənbələr Sionist rejimin cənub Suriyada, xüsusən də Quneytrə bölgəsində artan təcavüzlərinə diqqət çəkərək bildiriblər ki, dünən İsraillilər bir neçə Suriya vətəndaşını, o cümlədən bir uşağı oğurlayıblar və İsrail ordusunun Suriyanın torpağında həyata keçirdiyi bu cinayətlər qarşısında hökumətin səssizliyi və passivliyi qəbuledilməzdir.
Real-israil saytının məlumatına görə, Sionist rejimin Suriyanın torpaqlarındakı təcavüz və işğalları davam edir və beynəlxalq əlbirlik və Əbū Məhəmməd Culaninin rəhbərlik etdiyi hökumətin səssizliyi fonunda Suriya mənbələri bildiriblər ki, dünən, bazar ertəsi səhəri, 11 zirehli maşın və digər hərbi nəqliyyat vasitələri ilə yanaşı, polis itləri ilə birlikdə bir qrup Sionist hərbçi Quneytrənin cənubundakı Əd-Duvəyə və Ayn əz-Zeytun kəndlərinə daxil olub və bir neçə Suriya vətəndaşını oğurlayıb.
Quneytrədəki məlumatlı Suriya mənbələri “əl-Ərəbiy əl-Cədid” veb saytına bildiriblər ki, Sionist işğalçı qüvvələr Əhməd əl-Kəriyyan, qardaşı Ədnən əl-Kəriyyan və 14 yaşlı Mərvan adlı uşağı oğurlayıblar. Qeyd olunmalıdır ki, Əhməd əl-Kəriyyan Bəşər Əsədin rəhbərlik etdiyi əvvəlki Suriya hökumətinə qarşı olan tanınmış müxaliflərdən biri idi və bir neçə il həbsdə qalmışdı.
Əd-Duvəyə kəndindən təhlükəsizlik səbəbilə adını açıqlamaq istəməyən bir Suriya vətəndaşı bildirib ki, İsrail ordusunun patrul qüvvələri yerli sakinləri İsrail qüvvələrinin hərəkətləri ilə bağlı istənilən etiraz və ya məlumat ötürməmək barədə xəbərdar ediblər və onları hədələyiblər.
O əlavə edib ki, İsrail hərbçiləri hücumlarını axtardıqları şəxslərin 2025-ci ilin əvvəlində Əd-Duvəyə kəndində İsrail ordusuna qarşı keçirilən nümayişlərdə iştirak etdikləri iddiası ilə əsaslandırıblar.
Bu Suriya vətəndaşı vurğulayıb: son zamanlarda İsrailin Quneytrə və Dəranın cənub-qərbindəki kənd və şəhərlərə təcavüzləri nəzərəçarpacaq dərəcədə artıb və bu basqın və hücuçlar müqavimət oxu ilə əməkdaşlıq edən şəxsləri axtarmaq bəhanəsi ilə həyata keçirilir. Ancaq bu təcavüzlərin davam etməsi Sionistlərin əsl məqsədləri barədə çoxlu suallar yaradır.
Mənbə deyib ki, İsrail ordusunun həyata keçirdiyi bu hərəkətlər rejimin cənub Suriyada qarşıdurma qaydalarını yenidən çəkmək planının bir hissəsidir və İsrail cənub Suriyanı siyasi və hərbi oyun meydanı hesab edir. Ancaq bu məsələnin ən ağrılı tərəfi odur ki, İsrailin Quneytrədəki təcavüz və adam oğurluqları nə yeni Suriya hökuməti, nə siyasi qüvvələr, nə də vətəndaş cəmiyyəti təşkilatları tərəfindən heç bir reaksiya ilə qarşılanmır.
Həmin suriyalı vətəndaş əlavə edib ki, xalq bu vəziyyətdən çox yorulub, çünki prioritetlər dağılmış və hökumət verdiyi vədlərə əməl etmir, İsrailin davamlı təcavüzləri və suriyalı uşaqların heç bir ittiham irəli sürülmədən oğurlanması qarşısında hökumətin səssizliyi əsla qəbuledilməzdir.
Suriyalı fəal Səid Məhəmməd daha əvvəl bildirib ki, Quneytrədə vəziyyət dözülməz və çox pisdir, çünki xalqın işi və həyatı iflic olub, çox qorxurlar və onları qoruyan ya da sözlərini dinləyən heç kim yoxdur. Beynəlxalq ictimaiyyət də gözünü və qulağını bağlayıb və Suriya xalqı heç bir dəstək almır, eləcə də xalqını müdafiə etmək gücündə olmayan bir hökumətə sahibdir.
O əlavə edib ki, görünür İsrailin Suriyadakı işğalı artıq sabitləşib və bu rejim geri çəkilmək niyyətində deyil və əgər müqavimət göstərilməzsə, Sionistlər heç vaxt Suriyadan çıxmayacaqlar. Sionist işğalçı rejim bu gün Quneytrədəki müxtəlif xalq qruplarını bir-birindən ayırmağa və onlar arasında məzhəbi və tayfa ixtilafları yaratmağa çalışır.
Suriya yerli mənbələri bildiriblər ki, Sionistlər silahsız mülki şəxsləri hədəf alırlar və bu, Suriyanın suverenliyinin açıq şəkildə pozulmasıdır. Həmçinin Culani hökumətinin İsrailin Suriyanın torpaqlarına və vətəndaşlarına qarşı təkrarlanan təcavüzləri qarşısındakı rəsmi səssizliyi davam edir və bu, Suriyanın təhlükəsizlik vəziyyəti barədə çoxlu suallar doğurur.
Sionistlərin Suriyanın müxtəlif bölgələrinə, xüsusilə də ölkənin cənubuna təcavüzlərinin artması, son günlərdə Suriya ilə Sionist rejim arasında normallaşma razılaşmalarına qoşulmaq ehtimalı ilə bağlı artan fikirlərlə eyni vaxta təsadüf edir.
Əlaqədar xəbərlər
