Sionist hərbiçilər İordan çayının qərb sahilinin müxtəlif bölgələrinə hücum edərək onlarla fələstinlini həbs ediblər.
Xarici KİV-in verdiyi məlumata görə, İsrail rejiminin ordusu dünən gecə və bu gün səhər saatlarında işğal altındakı İordan çayının qərb sahili və Qüdsün müxtəlif bölgələrinə kütləvi hücumlarını davam etdirib.
Bununla əlaqədar olaraq, sionsit rejimin qüvvələri Tülkərm, Qəlqiliyyə və əl-Xəlil şəhər və kəndlərinə hücum edib. Yerli mənbələr İsrail qüvvələrinin təkcə əl-Xəlildəki bir kəndə hücumu nəticəsində 20 fələstinlinin həbs olunduğunu açıqlayıb.
İordan çayının qərb sahilinin şimalında ordu əsgərləri Qəlqiliyyə şəhərinin ərazilərinə hücum edərək bir neçə nəfəri həbs edib. Hücum dalğası şəhərin şərqində yerləşən Əzzun və Hiccə kəndlərində də davam edib.
İsrail hərbiçiləri Nablusun cənubundakı Qaryut kəndinə də hücum edib, fələstinli gənclərin müqaviməti ilə üzləşib.
Həmçinin verilən məlumata əsasən, sionist köçkünləri işğal altındakı Qüdsün şimal-şərqində yerləşən Həzma qəsəbəsinin şərq hissələrinə hücum edərək fələstinlilərə xəsarət yetiriblər. Son günlərdə İsrail ordusunun dəstəyi ilə həyata keçirilən bu hücumlar fələstinlilərin yaşadığı bölgələrə yayılıb. Sionistlər bu hücumlarda fələstinli kənd və şəhərlərə basqın edir və kənd təsərrüfatı məhsullarını məhv edirlər.
Qəzzəyə qarşı sionist rejimin hücumu və soyqırımı başladıqdan sonra İordan çayının qərb sahilinə olan təcavüz də genişlənib. İsrailin zirehli və hərbi texnikası daim qərb sahilinin müxtəlif şəhərlərinə hücum edib. 7 Oktyabrdan bəri qərb sahilinin müxtəlif bölgələrinə edilən sionist hücumları nəticəsində azı 960 nəfər şəhid olub, 7000-dən çox insan yaralanıb və 16 mindən çox şəxs həbs olunub. Bu müddət ərzində on minlərlə insan evlərini və yurdlarını tərk etməyə məcbur qalıb.
