Əl-Məyadin telekanalı işğalçı sionist qüvvələrin onların Fələstin işğal olunmuş ərazilərindəki ofis rəhbəri Naser əl-Ləhhəmi həbs etdiyini açıqlayaraq, ərəb və beynəlxalq media cəmiyyətindən işğalçı rejimin medianı hədəfə alan sistematik və vəhşi cinayətlərini qınamağı və jurnalistləri bu hücumlardan qorumaq üçün dəstək olmağı tələb edib.
Real-israil sayının məlumatına görə, mediaya və jurnalistlərə qarşı hücumlar sionist rejim ordusunun adi cinayətlərindən birinə çevrilib, işğalçılar Qəzza müharibəsindən əvvəl də medianın hüquqlarını pozurdular. Əl-Məyadin bu gün verdiyi açıqlamada bildirib ki, sionist işğal qüvvələri jurnalist və kanalın Fələstindəki ofis rəhbəri Naser əl-Ləhhəmi bu gün səhər saatlarında həbs ediblər.
Hesabata görə, Şabak xidməti zabitləri və qüvvələri onun evinə vəhşicəsinə hücum edərək əşyalarını talayıb, elektron avadanlıqlarını və mobil telefonlarını məhv edib və müsadirə ediblər.
Əl-Məyadin kanalının açıqlamasında bildirilib: “İşğalçıların mediaya, söz və həqiqət azadlığına qarşı nümayiş etdirdiyi sadist davranışlar fonunda Naser əl-Ləhhəmin həbsi təəccüblü deyil. Biz sionist rejimin bu cinayətini qətiyyətlə pisləyir, 30 illik peşəkar jurnalist təcrübəsinə malik fələstinli jurnalist Naser əl-Ləhhəmin dərhal azad olunmasını tələb edirik.”
Əl-Məyadin fələstinli və ərəb media qurumlarına səslənərək Naser əl-Ləhhəmin azadlığı üçün həmrəylik nümayiş etdirməyə və səs qaldırmağa çağırıb.
Kanal əlavə edib: “Naser əl-Ləhhəm peşəkar fələstinli və ərəb jurnalistidir, media qaydalarına əməl edir və reallığı ən yüksək peşəkarlıqla dünyaya çatdırır. Biz həmçinin regional və beynəlxalq media təşkilatlarını işğalçıların jurnalistlərə qarşı cinayətlərini qınamağa çağırırıq, çünki rejim Qəzzada jurnalistlərin qətliamını davam etdirir.”
Bəyanatda həmçinin deyilir: “Ümid edirik ki, Fələstin Muxtariyyəti və Ramallah rəhbərliyi Naser əl-Ləhhəmin həbsi məsələsini diqqətdə saxlayacaq, çünki o, qanun çərçivəsində fəaliyyət göstərən fələstinli bir jurnalistdir. Biz ona təkcə Əl-Məyadinin ofis rəhbəri kimi deyil, ərəb dilli və fələstinli nüfuzlu jurnalist kimi baxırıq və onu müdafiə etməkdən əsla çəkinməyəcəyik. Naser əl-Ləhhəm öz xalqını müdafiə edən təsirli media siması və fələstinlilərin görkəmli şəxsiyyətlərindən biridir.”