İsrail işğalçı ordusu Qəzza zolağında fələstinlilərə qarşı qətliamlarını davam etdirir. Son saatlarda xüsusilə Xan Yunis və Rəfəh vilayətlərində, eləcə də Qəzza şəhəri və mərkəzi bölgələrdə məcburi köçkün çadırlarına və mülki ərazilərə birbaşa hədəflənmiş hava və artilleriya hücumları nəticəsində şəhid və yaralılar qeydə alınıb.
Qəzza zolağının cənubunda yerləşən Xan Yunisdə işğalçı təyyarə və helikopterlər şəhərin qərbindəki Əl-Məvasi bölgəsinə intensiv hava hücumları həyata keçirib. “Riviera” adlı şaleya (dincəlmək üçün nəzərdə tutulmuş bir istirahət məkanı) yaxın bir çadırın hədəf alınması nəticəsində azı bir fələstinli şəhid olub, bir neçəsi isə yaralanıb.
İşğalçı ordu “Əl-Masa əl-Cəmil” istirahətgahının yaxınlığında, Nəsr küçəsində yerləşən başqa bir çadırı da bombalayıb. Mülki Müdafiə xidməti Nəsir Tibb Kompleksi ətrafında yerləşən qərb bölgəsindəki çadıra edilən hücumdan sonra iki şəhid və bir neçə yaralını çıxardıqlarını bildirib.
Yeni bir qətliamda işğalçı ordu Əl-Məvasi bölgəsində, Ər-Ribat Kolleci yaxınlığında əl-Biyuk ailəsinə məxsus bir çadırı bombalayıb. Nəticədə ailənin dörd üzvü – Məhəmməd Zəki əl-Biyuk (40 yaş), Oudə Məhəmməd əl-Biyuk (10 yaş), Misk Məhəmməd əl-Biyuk (13 yaş) və Səməh Səid əl-Biyuk (37 yaş) şəhid olub. Beşinci küçədə, Məvasi məktəbinin yaxınlığındakı başqa bir çadır da hədəfə alınıb. Şəhid və yaralılar barədə dəqiq məlumat verilməyib.
İşğalçı ordu həmçinin Xan Yunis şəhərinin cənubundakı Bətn əs-Səmin və Qeyzan Rəvşan bölgələrini də güclü artilleriya atəşi və hərbi texnikadan açılan atəşlə hədəf alıb. Eyni zamanda, İsrail pilotsuz təyyarələri şəhərin qərb hissələrindəki müxtəlif bölgələri bombalayıb.
Qəzza zolağının cənubundakı Rəfəh şəhərində, “Riviera” bölgəsində məcburi köçkünlərin çadırları yenidən bombalanıb. Nəticədə azı bir fələstinli şəhid olub, bir neçəsi yaralanıb.
Şimal-qərbdəki əş-Şakuş bölgəsi də artilleriya ilə bombalanıb. Tibbi mənbələr bildirir ki, İbrahim İmran əl-Bəyumi və Əntər Amir əl-Bəyumi Rəfəh-Qərbi Xan Yunis yolundakı 17-ci döngə yaxınlığında bombalanaraq şəhid olublar.
Qəzzanın mərkəzində yerləşən Deyr əl-Bələh şəhəri də hava hücumuna məruz qalıb. Əl-Bənna çörək zavodunun yaxınlığındakı bir mənzilə hücum nəticəsində bir fələstinli şəhid olub, digərləri yaralanıb. Şəhərdəki bir mövqeyə də pilotsuz təyyarə ilə hücum edilib. Eyni vaxtda müxtəlif hədəflərə artilleriya zərbələri endirilib.
Mərkəzi Qəzza zolağında yerləşən Bureyc düşərgəsində, işğalçı ordu Abu Həlu Şərqi məktəbini bombalayıb. Bu məktəb məcburi köçkünlər üçün sığınacaq idi. Mülki Müdafiə orqanlarının məlumatına görə, hücum nəticəsində bir neçə şəhid və yaralı var.
Xilasetmə qrupları dağıntılar altından cəsədləri çıxararkən bombardmanlar davam edirdi. Mənbələr bildirir ki, İsrail təyyarələri məktəbə birbaşa hava zərbəsi endirib və bu, məktəbdə böyük dağıntıya səbəb olub.
Qəzza şəhərində də işğalçı ordunun əməliyyatları intensivləşib. Şəhərin şərqində yerləşən Şucaiyə və Zeytun məhəllələri artilleriya atəşi ilə güclü şəkildə vurulub. Eyni zamanda, bölgədə hava hücumları və yaşayış binalarının məhv edilməsi davam edib.
Bu hadisələr İsrail ordusunun Qəzza zolağında davamlı eskalasiyası fonunda baş verir. Məcburi köçkünlərin sığınacaqları, mülki bölgələr və səhiyyə müəssisələrinin hədəfə alınması beynəlxalq hüquq və humanitar qanunların kobud şəkildə pozulması ilə müşayiət olunur.
2023-cü il oktyabrın 7-dən bəri İsrail ABŞ-ın dəstəyi ilə Qəzza zolağında soyqırım xarakterli müharibə aparır. Bu müharibəyə kütləvi qətl, aclıq, məcburi köçkünlük və infrastrukturun dağıdılması daxildir. Beynəlxalq Ədalət Məhkəməsinin qərarları və beynəlxalq ictimaiyyətin çağırışları isə tamamilə görməməzlikdən gəlinir.
Əlaqədar xəbərlər
