Qəzzada əsirlərin azad edilməsi və HƏMAS-ın məhv edilməsi məqsədilə aparılan əməliyyatların çıxılmaz vəziyyətə düşməsi, həmçinin beynəlxalq ictimaiyyətin və insan haqları təşkilatlarının xəbərdarlıqlarına baxmayaraq, İsrail və ABŞ Qəzza zolağındakı iki milyon fələstinlinin digər ölkələrə köçürülməsi planını irəlilətdiklərini açıqlayıblar.
Real-israil saytının məlumatına görə, News1 xəbər portalı yayımladığı hesabatda bildirib ki, ehtimal olunur, gələn həftə Tramp ilə keçirəcəyi görüşdə Benyamin Netanyahu bu məsələni ciddi şəkildə müzakirə edəcək.
İvritdilli media Qərb mənbəsinə istinadla yazır ki, İsrail hökuməti ötən cümə axşamı açıqlama verərək, Trampın iki milyon fələstinlinin Qəzzadan çıxarılıb digər ölkələrə köçürülməsi planının hələ də gündəmdə olduğunu bəyan edib. Halbuki bu plan ABŞ-ın müttəfiqləri və insan haqları təşkilatları tərəfindən beynəlxalq hüququn açıq və təhlükəli şəkildə pozulması kimi qiymətləndirilərək kəskin rədd edilib.
Buna baxmayaraq, İsrail hökumətinin sözçüsü David Meinzer mediaya bildirib: “Prezident Tramp planın hələ də masada olduğunu vurğulayıb, biz də bunun yaxşı ideya olduğunu düşünürük və baş nazir bu planı alqışlayıb.”
Bu açıqlamalar Netanyahunun gələn həftə Ağ Evə edəcəyi səfərdən əvvəl səslənib. Həmin səfərdə onun Tramp ilə görüşərək HƏMAS-la mümkün atəşkəs və Qəzzanın gələcəyi məsələlərini müzakirə edəcəyi gözlənilir.
Tramp bu planı fevral ayında açıqlamışdı; plana görə ABŞ Qəzzaya nəzarəti öz üzərinə götürəcək və onu “Yaxın Şərqin Rivyerası”na çevirəcəkdi. O vaxt Tramp Qəzzanı “dağıdılmış bir məkan” adlandıraraq fələstinlilərin oradan köçməkdən başqa seçimi olmadığını iddia etmişdi.
Media etiraf edir ki, İsrail ordusu bu planın icrası üçün eyni vaxtda iki istiqamətdə hərəkət edib: bir tərəfdən, Qəzzadan fələstinlilərin könüllü miqrasiyasını təbliğ edərək, ABŞ və hədəf ölkələrlə birlikdə bunu həyata keçirməyə çalışıb (lakin Qəzza əhalisinin demək olar ki, heç bir maraq göstərməməsi səbəbindən bu plan uğursuz olub).
Digər tərəfdən, ordunun Qəzzadakı hərbi əməliyyatları çərçivəsində yüzlərlə fələstinlini qətlə yetirərək bölgədə qalan binaları dağıdıb və əhalini müəyyən məhdud ərazilərə toplamağa məcbur edib. Bu zaman İsrailin maliyyə naziri Betsalel Smotriç etiraf edib ki, bu əməliyyatların məqsədi Qəzza zolağını tam işğal etməkdir.