Sionist rejiminin qırıcıları və artilleriyaları Qəzzə zolağına olan hücumun 249-cu günündə Qəzzənin müxtəlif bölgələrini atəşə tutub, vətəndaşların mənzillərini və adi insanların toplaşdığı mərkəzləri bombalayaraq onlarla insanı şəhid edib yaxud da yaralayıblar.
Mülki müdafiənin xilasetmə qrupları Qəzzə şəhərinin Şeyx Rizvan və əd-Durc məhəllələrindəki dağıntılar altından bir neçə şəhidin cənazəsini çıxarıblar, amma dağıntılar altında qalan insanların axtarışları davam edir.
Sionist rejiminə aid qırıcıların Qəzzə şəhərinin Şeyx Rizvan məhəlləsində yerləşən Əbu İskəndər məntəqəsində fələstinli bir ailənin evinə hücumu nəticəsində bir sıra vətəndaş şəhid olub ya da yaralanıb. Hələ də dağıntılar altında qalan insanların axtarışları davam etdirilir. Yaralılar və şəhidlər əl-Məmədani xəstəxanasına köçürülüblər.
Həmçinin Qəzzənin mərkəzində yerləşən əd-Durc məhəlləsində sionist qırıcılarının hücumlarına məruz qalan fələstinli bir ailəyə aid evin dağıntıları altından əksəriyyəti uşaq olan 8 şəhid və bir neçə yaralı çıxarılıb.
Bundan əlavə, işğalçı rejimin ən-Nəsirat düşərgəsinin qərbinə olan artilleriya hücumunda bir neçə vətəndaş şəhid olub. Rəfəh şəhərinin mərkəzində, qərbində və şimalında da digər bölgələr işğalçı rejimin artilleriya hücumlarının hədəfinə çevriliblər. İşğalçı rejimin qırıcılarının Rəfəhin qərbində yerləşən təsərrüfat sahələrinə hücumlarında fermerlərdən bir neçəsi şəhid olub yaxud da yaralanıb.
Fələstinli mənbələr bildiriblər ki, sionist hərbiçilərinin Qəzzənin cənubunda yerləşən əl-Məvasi məntəqəsindəki qaçqın çadırlarına atəş açmaları nəticəsində bir neçə fələstinli yaralanıb.
Digər tərəfdən də Fələstin Qırmızı Aypara cəmiyyəti sionist rejimi ordusunun hücum əməliyyatlarında israilli əsirlərin azad olunması üçün humanitar yardımlar daşıyan xüsusi yük maşınlarından istifadə etməsini pisləyib, onu hərbi cinayət və beynəlxalq qanunların açıq-aşkar pozuntusu adlandırıb.
Bu qrum beynəlxalq qanunlara əsasən mülki əhalinin və işçilərin humanitar və tibb sahələrində təcili olaraq himayə olunmalarının vacibliyini dünya ictimaiyyətinə xatırlatmaqla yanaşı, kütləvi aclığın yayıldığı bir vaxtda Rəfəh keçidinin bağlı qalmasının davam etməsi barəsində xəbərdarlıq edib və deyib: Bu kütləvi cəzaların fələstinlilərə tətbiq edilməsi Qəzzədə humanitar vəziyyətin ağırlığının artmasına səbəb olur və bu, Haaqa məhkəməsinin hökmünün və beynəlxalq humanitar hüquqların açıq-aşkar pozuntusu hesab olunur.