İsrail rejiminin hərbçiləri əvvəlcədən görülməmiş bir addım ataraq, İordan çayının qərb sahilində yerləşən Cenin düşərgəsini ziyarət edən, ərəb və Avropa ölkələrinin bir neçə səfiri və siyasi nümayəndəsindən ibarət diplomatik heyətə atəş açıblar. Bu hadisə Fələstin Xarici İşlər Nazirliyinin sərt reaksiyası və dünya səviyyəsində tədbir görülməsi çağırışı ilə qarşılanıb.
Xarici KİV-in şənbə günü verdiyi məlumata görə, işğalçı rejim ordusu 30 müxtəlif Avropa və ərəb ölkələrindən olan siyasi nümayəndələr və səfirlərdən ibarət diplomatik heyətə atəş açıb.
Xəbərdə bildirilib ki, bu heyət İordan çayının qərb sahilinin şimalında yerləşən Cenin düşərgəsinin ətrafında sahə ziyarəti zamanı İsrail hərbçilərinin birbaşa atəşinə məruz qalıb.
Fələstin Muxtariyyətinin Xarici İşlər Nazirliyi rəsmi bəyanat yayaraq bu hadisəni beynəlxalq diplomatik ictimaiyyətə qarşı açıq-aşkar hədə və qorxutma nümunəsi adlandırıb və onu sərt şəkildə pisləyib.
Bəyanatda qeyd olunub: “İsrail ordusu Cenin düşərgəsinin girişində bu xarici heyəti qorxutmaq və təhdid etmək məqsədilə onlara döyüş güllələri ilə atəş açıb.”
Nazirlik beynəlxalq ictimaiyyəti, xüsusilə hücuma məruz qalmış heyətin üzvü olan ölkələri bu düşməncəsinə və beynəlxalq hüquqa zidd hərəkətə qarşı açıq, qəti və layiqli mövqe tutmağa çağırıb.
Eyni zamanda, İtaliya Xarici İşlər Nazirliyi rəsmi bəyanat yayaraq Təl-Əvivdən bu hadisə ilə bağlı aydın və dərhal izahat verməsini tələb edib.
Roma diplomatik heyətə hücumun beynəlxalq münasibətlərin əsas prinsipləri ilə ziddiyyət təşkil etdiyini, bu məsələdə açıq və məsuliyyətli cavab tələb olunduğunu vurğulayıb.
Bu çərçivədə, sionist media məlumat verib ki, İsrail ordusu Cenin düşərgəsini ziyarət zamanı nümayəndələri atəşə tutulan ölkələrdən rəsmi şəkildə üzr istəməyi planlaşdırır.
İsrail ordusunun radiosu, ordu rəsmilərindən birinə istinadla bildirib ki, xarici diplomatik heyət müəyyən edilmiş marşrutdan kənara çıxmışdı və hərbçilər onların diplomatik statusundan xəbərsiz olublar. Buna görə də açılan atəş sadəcə xəbərdarlıq məqsədi daşıyıb.
Beynəlxalq hüquq baxımından, diplomatik heyətlərə silahlı hücum Vyana Konvensiyalarının açıq şəkildə pozulması hesab olunur və bu hadisə İsrail rejimi üçün geniş diplomatik nəticələr doğura bilər.
Əlaqədar xəbərlər
