Xəbər mənbələri sionist rejiminin Qəzzə zolağının cənubunda yerləşən Rəfəh şəhərinə qarşı geniş şəkildə hava hücumları və 13 fələstinlinin şəhid olması barəsində məlumat veriblər.
Xarici KİV-in verdiyi məlumata əsasən, sionist rejiminin Rəfəh şəhərinə olan hava hücumları nəticəsində azı 13 nəfər şəhid olub və bəziləri də yaralanıblar.
Qəzzə zolağındakı tibbi mənbələr Rəfəhin mərkəzində yerləşən əş-Şaburah düşərgəsində Covdə ailəsinə aid mənzilin bombalanması zamanı bir fələstinlinin, qardaşının kiçik qızı və həyat yoldaşı ilə birlikdə şəhid olduğunu açıqlayıblar.
Həmçinin həmin məntəqədə başqa bir mənzilin bombalanması nəticəsində əksəriyyəti uşaqlardan ibarət bir sıra insan yaralanıb.
Rəfəhin şərqində də Curc küçəsindəki bir ev hücuma məruz qalıb. Nəticədə isə 6-sı uşaq olmaqla, ümumilikdə 10 nəfər şəhid olub, bir sıra insan isə yaralanıb.
Eyni zamanda Fələstin Mülki Müdafiə Təşkilatı da bildirib: Sionist rejiminin qırıcıları Rəfəhin şərqində yerləşən Curc küçəsindəki Əbdül-Al ailəsinə məxsus bir neçə mərtəbədən ibarət olan bir yaşayış binasını hədəfə alıblar. Bizim qüvvələrimiz hələ də şəhidləri dağıntılar altından çıxarmaq və itkin düşənləri tapmaq üçün çalışırlar.
Bundan öncə də sionist rejimi Rəfəhin şimalındakı bir əkin sahəsində çadırda yaşayan bir qaçqın ailəsini bombalamış və ailə üzvlərindən bir neçəsi yaralanmışdı.
Tibbi mənbələr, həmçinin Rəfəhin bombalanmasının ardınca bir neçə yaralının Əbu Yusif ən-Nəccar xəstəxanasına köçürüldüyü haqda məlumat veriblər.
Bundan əlavə, sionistlər əz-Zəhra və əl-Məğraqə məntəqələrini də bombalayıblar.
Bu hücumlar son günlər xəbər mənbələrinin sionist rejiminin qurudan hücum etmə ehtimalı barəsində xəbərdarlıq etdikləri halda baş verir.