Vəkil fələstinli həkimin təcrid olunmuş yeraltı kamerada saxlanıldığını və səhhətinin pisləşdiyini açıqlayıb
Qəzzalı həkim Hüssam Əbu Səfiyənin səhhətinin ağırlaşması və İsrail həbsxanasında gördüyü işgəncələrlə bağlı vəkili ciddi narahatlıq ifadə edib. Onun sözlərinə görə, məhbuslara gündə cəmi iki qaşıq düyü verilir.
Cümə axşamı “Arab48” saytına verdiyi müsahibədə vəkil Ğid Qasım bildirib ki, Qəzza zolağının şimalında yerləşən Kamal Ədvan Xəstəxanasının direktoru dəfələrlə ağır fiziki zorakılığa məruz qalıb və bunun nəticəsində başında, boynunda, qabırğalarında və kürəyində ciddi göyərmələr yaranıb.
Əbu Səfiyə döyülmədən sonra ürək ritminin pozulması da daxil olmaqla, tibbi yardım tələb etsə də, bu tələbi rədd edilib.
İsrail tərəfindən idarə olunan həbsxanalarda məhbuslara qarşı tibbi laqeydlik və zorakılıq halları yaxşı sənədləşdirilib və 2023-cü il 7 oktyabr hadisələrindən sonra bu hallar daha da artıb.
Mayın əvvəlində Fələstinli Məhbuslarla İş üzrə Komissiya bəyan etmişdi ki, xəstə fələstinli məhbuslar “qəsdən və sistematik tibbi səhlənkarlıq”, aclıq və işgəncə nəticəsində səhhət problemləri ilə üzləşirlər.
Bu açıqlama 60 yaşlı məhbus Muhyiddin Fəhmi Nacəmin ölümü ilə bağlı verilmişdi. O, xroniki xəstəliklərdən əziyyət çəkirdi və həbsdə olduğu müddətdə lazımi tibbi yardım ala bilməmişdi.
Vəkilinin sözlərinə görə, hazırda Ofer hərbi həbsxanasında saxlanılan Əbu Səfiyənin çəkisi 60 kiloqramdan çox deyil. Bu həbsxanada Qəzza zolağından gətirilmiş 450-dən çox məhbus saxlanılır.
Əlavə olaraq, Əbu Səfiyə yeraltında, tam təcrid olunmuş və günəş işığı almayan kamerada saxlanılır.
“O, xarici dünyadan heç bir məlumat almır, hələ də qış geyimlərindədir,” – deyə Qasım bildirib.
“Ofer həbsxanasındakı məhbuslar olduqca ağır və fəlakətli şəraitdə yaşayırlar,” – o əlavə edib.
Qasım bildirib ki, həmin həbsxanada saxlanılan fələstinli məhbuslara yalnız gündə iki qaşıq düyü verilir. Şəkər və duz isə tamamilə qadağandır: “çünki bu maddələrdən istifadə edərək, hətta azca da olsa, sevinc hormonu artmasın deyə”.
“Buna əlavə olaraq, məhbuslar tez-tez kameraların basqınına, işgəncələrə və daimi axtarışlara məruz qalırlar.”
Ən son məlum tibbi səhlənkarlıq və işgəncə halı, 53 yaşlı Cənin sakini Səmir ər-Rifainin ölümü ilə bağlıdır.
Fələstinli Məhbuslarla İş üzrə Komissiyanın məlumatına görə, Rifai həbs olunduqdan yeddi gün sonra dünyasını dəyişib. Beləliklə, Qəzzada müharibə başladıqdan bu yana İsrailin həbsxanalarında ölən fələstinli məhbusların sayı 74-ə çatıb.
Beş uşaq atası olan Rifai ürək xəstəliklərindən əziyyət çəkirdi və müntəzəm tibbi nəzarətə ehtiyacı var idi. Mənbələr bildirirlər ki, onun ölümü həbsxanadakı pis şərait və fiziki işgəncələrin nəticəsidir, baxmayaraq ki, rəsmi hesabat hələ yayımlanmayıb.
Hüquqi statusdan məhrum
İsrail hakimiyyəti Əbu Səfiyəni, sivil həkim olmasına baxmayaraq, “qanunsuz döyüşçü” kimi təsnif edib. Bu, onun barəsində rəsmi ittihamın irəli sürülmədiyi mənasına gəlir.
“Qanunsuz döyüşçü statusu məhbusu hüquqsuz edir,” – deyə vəkil bildirib.
“İsrail qanunvericiliyi bu statusa malik şəxsləri həbsxanalarda ən elementar insan haqlarından belə məhrum edir.”
Qasım əlavə edib ki, vəkillərin görüş keçirməsi üçün dəfələrlə süni əngəllər yaradılır. Hər bir görüş təxminən dörd ay öncədən planlaşdırılmalı və son anda ləğv oluna bilər.
Bundan əlavə, vəkillər uzun müddət gözlədilir və məhbuslar görüş otağına gətirilərkən əlləri qandallanmış vəziyyətdə sürünərək gətirilir və tez-tez döyülürlər.
“Görüşlər kameraların, mühafizəçilərin baxış və qulaqları altında baş tutur. Əgər mühafizəçilər hiss edirlərsə ki, bu görüş məhbusun ruh yüksəkliyini artırıb, dərhal qisas alaraq ona fiziki təzyiq göstərirlər,” – deyə vəkil bildirib.
Qasımın sözlərinə görə, məhbuslar eyni zamanda davamlı psixoloji işgəncələrə də məruz qalırlar – onlara qəsdən qrafik görüntülər, acı xəbərlər göstərilir və bəzən yaxınlarının guya öldüyü barədə yalan məlumatlar verilir.
“Hər bir məhbusun mənə verdiyi ilk sual ailəsinin sağ olub-olmaması ilə bağlı olur,” – deyə Qasım bildirib.
Əlaqədar xəbərlər
