Fələstin mənbələri işğalçı İsrail ordusunun Qəzzənin şimalındakı müxtəlif bölgələrə onlarla insanın şəhid olub, yaralanması ilə nəticələnən hücumlar həyata keçirdiyini bildiriblər.
İşğalçı İsrail ordusu Beyrutun Zahiyə bölgəsinə qarşı hücumları ilə eyni zamanda Qəzzənin şimalında yerləşən müxtəlif bölgələri də hava və artilleriya hücumlarına məruz qoyub.
Xarici KİV-in verdiyi məlumata görə, bu hücumlar dünən gecədən başlayıb və hələ də davam edir. Belə ki, Qəzzənin şimalında indiyə qədər 50-dən çox hücum qeydə alınıb.
Bu hücumlar nəticəsində indiyədək 30 nəfər şəhid olub və 150 nəfər isə yaralanıb ki, onların da əksəriyyəti qadın və uşaqlardır. Onların çoxu Qəzzənin mərkəzində yerləşən “əş-Şafi” məktəbinin bombalanması zamanı şəhid olublar. Hansı ki o məktəb mülki şəxslərin sığınacaq yerinə çevrilmişdi.
Bu ağır hücumlardan sonra Qəzzə Yardım Təşkilatı dağıntıların və bombardmanların çoxluğuna görə xilasetmə qüvvələrinin işin öhdəsindən tam gələ bilmədiklərini açıqlayıb.
Qəzzə Yardım Təşkilatından verilən məlumatda bildirilib ki, onlarla insanın cəsədi hələ də binaların dağıntıları altında qalıb və dağıntıların aradan qaldırılması, şəhidlərin yaxud yaralıların çıxarılması üçün xilasetmə qüvvələrinin kifayət qədər imkanları və təchizatları yoxdur.