Sky News eksklüziv hesabatında İsrail ordusunun ehtiyatda olan əsgərinin Qəzzədə dinc sakinlərin özbaşına öldürülməsindən bəhs edən şok xəbər təqdim edib.
İsrailin üç dövr Qəzzada xidmət etmiş ehtiyat əsgəri bu gün Sky News ilə nadir bir video müsahibədə bildirib ki, İsrail əsgərlərinə Qəzzədə təhlükə yaratıb-yaratmamasından asılı olmayaraq hər kəsə atəş açmaq və öldürmək əmri verilib.
Bu anonim İsrail əsgəri İsrail ordusunun 252-ci diviziyasının ehtiyat qüvvəsi olaraq təqdim edilib və iki dəfə Nətsarim dəhlizinə göndərilib; bu, müharibənin əvvəlində Qəzzə zolağını ortadan iki bölən, dənizdən işğal altındakı Fələstin sərhədinə qədər uzanan dar bir sahədir və bölgəni bölməklə İsrail qüvvələrinin Qəzzə daxilində nəzarətini artırıb.
O, deyib ki, birliyi tez-tez “qadağan olunmuş ərazilərə” daxil olan hər kəsə atəş açmaq əmri alırdı və buna görə də əsgərlər mülki şəxsləri özbaşına öldürürlər.
Bu əsgər, “qadağan olunmuş ərazi”nin necə müəyyənləşdirildiyi barədə danışaraq, qeyd edib ki, birlik yaşayış məntəqəsinin kənarında yerləşəndə, əsgərlər Fələstinli qaçqınlara məxsus boş evdə yatıblar və o evin ətrafında görünməz bir sərhəd çəkilib ki, bu sərhəd Qəzzə sakinləri üçün “qadağan olunmuş zona” kimi müəyyən olunub.
O, bildirib: “Olduğumuz evlərdən birində geniş bir sahə var idi. Bu, insanların yaşadığı yaşayış məhəllələrinə ən yaxın nöqtə idi. Bizə bir xətt göstərildi ki, bütün Qəzzə sakinləri onu tanıyır və bilirlər ki, oradan keçmək qadağandır.” Daha sonra öz-özünə soruşub: “Amma onlar bunu necə bilməlidirlər?” və əlavə edib: “Bu əraziyə daxil olanların çoxu atəş hədəfi olurdu, hətta bir gənc uşaq velosipedlə keçəndə belə.”
Bu hərbçi Qəzzədəki mülki əhaliyə qarşı soyqırımı əsaslandırmaq üçün bu rejimin rəsmilərinin və səlahiyyətlilərinin dilindən səslənən bəhanələrə toxunaraq deyib ki, İsrail qüvvələri arasında yayılmış ümumi düşüncə belədir: “Qəzzədəki bütün insanlar terrorçudur, hətta tamamilə silahsız olduqları zaman belə.” O, əlavə olaraq qeyd edib: “Bu baxış tərzi nə sorğulanır, nə də rədd edilirdi, əksinə, tez-tez komandirlər tərəfindən təsdiqlənirdi.”
O, həmçinin deyib: “Nətsarim yolunda xidmət edirdim və bizə deyirdilər ki, əgər kimsə bu yola gəlirsə, deməli o, burada olmamalı olduğunu bilir. Və buna baxmayaraq gəlirsə, deməli o, terrorçudur.”
O əsgər sonda deyib: “Həqiqətən düşünmürəm ki, bu inanc doğru olsun. Onlar sadəcə yoxsul və mülki insanlardır. Həqiqətən də çox seçimləri yoxdur.”