Xan Yunis şəhərində yerləşən Nasir xəstəxanası Qəzzənin şimalındakı Əş-Şifa xəstəxanasının ssenarisini yaşamaqdadır. İsrail rejimi oranı ağır bombalamaq və mühasirə etməklə, xəstəxanada olan xəstələri və qaçqınları tədriclə öldürmək və oranı işğal etmək niyyətindədir.
“Ölüm hər tərəfdən bizi əhatə edib. Hər yer qandır. Ata, ana və qardaşımın vəziyyəti ağırdır. Bəzən mobil telefonun işiğı ilə sarğılarını dəyişirik. İşğalçılar kompleksin ətraf məntəqələrə gedən girişlərinə nəzarəti ələ keçiriblər… Əgər yol açıq olsaydı belə, ailəm olmadan heç yerə getməzdim.” Bunları Dua Əbu Ömər (24 yaşlı) deyib. O, ötən cümə axşamı günü Xan Yunis şəhərində yerləşən Nasir Xəstəxana Kompleksinin arxa həyəti bombalanan zaman əksəriyyəti xəstə və yaşlı olan bir sıra fələstinlilərlə birlikdə yaralanıb.
Qəzzə zolağındakı Fələstin Səhiyyə Nazirliyinin sözçüsü Əşrəf əl-Qədrə də Nasir xəstəxanasının vəziyyətini fəlakətli adlandırıb və ötən cümə axşamı günündən etibarən dərmanların, ağrı kəsicilərin və hətta xəstəxanada olanlar üçün qida maddələrinin çoxunun bittiyini xəbər verərək, “xəstəxananın yalnız növbəti 3 gün yanacağı var” deyə bildirib. Hal-hazırda bu xəstəxanada 150 nəfər tibb işçisi, 350 nəfərdən çox xəstə və yaralı və yüzlərlə fələstinli qaçqın var. İsraillilər Xan Yunis şəhərində hərəkəti qadağan ediblər və buna görə də, yaralıların bir neçəsi şəhid olub. Bu ssenari şəhərin digər xəstəxanaları, o cümlədən Əl-Əməl xəstəxanası və Avropa xəstəxanası üçün təkrar olunmaqdadır.
Tibb işçisi Həsən Ziyad deyir ki, işğalçıların Xan Yunisdə Şifa və onlarla digər xəstəxanalarda ssenarini təkrarlamaq niyyətində olduqlarını bildiyim halda, xəstələri və yaralıları tərk etməyə hazır deyiləm. O, çərşənbə günündən etibarən bu xəstəxananın bəzi sektorlarının fəaliyyətinin dayandığına və bəzi təcili əməliyyatların işıqsız və ağrı kəsici dərmanlar olmadan həyata keçirildiyinə şahid olub.
İsrailli hərbiçilər ötən oktyabr ayının sonları və noyabr ayında Qəzzənin şimalındakı Şifa xəstəxanasını altında müqavimət qüvvələrinin tunelləri və tikintiləri olması iddiası ilə bir neçə həftə mühasirəyə aldılar. Dərman, elektrik və oksigen kapsulları çatışmazlığı bu xəstəxanada çoxlu sayda qaçqın və yaralının şəhid olmasına səbəb oldu. İşğalçılar sonda noyabrın 16-sı xəstəxananı tamamilə boşaldıb işğal etdilər. Amma heç vaxt öz iddialarını sübut edə bilmədilər. İşğalçılar bu xəstəxanadan çıxdıqdan sonra Ümumdünya Səhiyyə Təşkilatının üzvləri ora baxış keçirdilər və bu tibb mərkəzini “ölüm zonası” adlandırdılar.
Xan Yunis şəhərinin tam nəzarətini ələ keçirmək üçün bir aydan çox səy göstərən İsrail rejimi ordusu bir neçə gündür ki, Şifa xəstəxanasından sonra Qəzzə zolağının ən böyük xəstəxanası olan Nasir Xəstəxana Kompleksini ağır bombardmanlara məruz qoyub. Eyni zamanda rejimin quru qüvvələri təkcə 10% gücü ilə fəaliyyət göstərən bu xəstəxanaya tərəf irəliləməyə çalışırlar. Buna görə də, xəstəxananın ətrafında müqavimət qüvvələri ilə qarşıdurmadadırlar.
Nasir xəstəxanasının tutumu 350 nəfərdir, amma hal-hazırda orada 1000 nəfərdən çox xəstə və yaralı var və rəhbərlik təcili çarpayıların sayını üç dəfə artırmağa, Əl-Əqsa Fırtınasından əvvəl sayı 4 olan əməliyyat otaqlarının ayını 12-yə və reanimasiya çarpayıların sayını 12-dən 40-a yüksəltməyə məcbur olub.
