Xəbər mənbələri şənbə günü günortadan sonra İsrail rejimi ordusunun Qəzzə zolağında 30-dan çox Fələstin vətəndaşının ölümünə səbəb olduğu yeni qırğından xəbər verib.
Xarici KİV-in verdiyi məlumata görə, Qəzzə zolağının Mülki Müdafiə Təşkilatının sözçüsü Mahmud Basal şənbə günü işğalçıların bölgədə törətdiyi cinayətlər barədə deyib: Sionist rejim Qəzzə şəhərinin “Əs-Səbra” bölgəsini bombalayıb, nəticədə 30-dan çox insan şəhid olub, 50-dən çox insan isə yaralanıb.
O, bildirib ki, bu ərazinin bombalanması səhnələri çox dəhşətlidir və tam qırğın baş verib.
Qəzzə zolağının Mülki Müdafiəsinin sözçüsü qeyd edib ki, bu ərazidə bir ev iki raketlə hədəfə alınıb.
Sionist rejimin ordusu Qəzzə zolağında qətliamları davam etdirərək, qaçqın çadırlarına və humanitar yardım istəyən insanlara qarşı şiddətli hücumlar həyata keçirib. Xəstəxana mənbələri şənbə günü səhər Qəzzə zolağının cənubundakı Xan Yunis şəhərinin qərbində qaçqın çadırlarının bombalanması zamanı 12 nəfərin şəhid olduğunu və 50-dən çox insanın yaralandığını bildirib.
Fələstin mənbələri də Qəzzə şəhərinin qərbində bir evin bombalanması zamanı çoxlu sayda fələstinlinin şəhid olması və yaralandığını bildirib. Bu mənbələr işğalçı qüvvələrin Qəzzə şəhərinin qərbində yerləşən “Şifa” xəstəxanasının kənarına endirdiyi və çoxlu sayda fələstinlinin şəhid və yaralandığı hava hücumundan da bəhs edib.
Nasir xəstəxanasındakı fələstinli tibbi mənbə də Qəzzə zolağının cənubundakı Rəfəh şəhərinin qərbindəki yardım paylama mərkəzinin yaxınlığında İsrail ordusunun açdığı atəş nəticəsində 5 nəfərin şəhid olduğunu və bir neçə nəfərin yaralandığını bildirib.
Eyni zamanda, işğalçı ordu Qəzzanın şimalındakı “Cəbəliə əl-Bələd”in şərqində yaşayış evlərini söküb. Qəzzanın şərqindəki yaşayış binaları da işğalçı qüvvələr tərəfindən sökülüb.
Əlaqədar xəbərlər
