Fələstin Qırmızı Aypara Cəmiyyəti Qəzzə müharibəsi boyunca 15000-dən çox fələstinli uşağın şəhid edildiyini açıqladığı halda, Qəzzə zolağının şimalındakı xəstəxanalar və bu bölgənin şimal və cənubunda fələstinlilərin məskunlaşdıqları məntəqələr hələ də sionist rejiminin hədəfləridir.
Xarici KİV-in verdiyi məlumata görə, sionist rejiminin Qəzzə zolağındakı qətliamından 229 gün ötür və Fələstin Qırmızı Aypara Cəmiyyəti müharibə başlayan vaxtdan bəri azı 15000 fələstinli uşağın şəhid olduğunu bildirir.
Bununla yanaşı, ötən gecədən bugün səhər saatlarına qədər Qəzzə zolağının müxtəlif bölgələrində bombardmanların şiddətlənməsi ilə onlarla fələstinli, o cümlədən bir hamilə qadın və bətnindəki körpə şəhid olub.
Bugün media mənbələri Qəzzə zolağının mərkəzində yerləşən əz-Zəvayidə şəhərciyində fələstinli qaçqınların məskunlaşdığı yerin bombalanması nəticəsində şəhid olmuş bir hamilə qadın və bətnindəki körpə də daxil olmaqla, onlarla fələstinlinin əl-Əqsa Şəhidləri xəstəxanasına yerləşdirildiyi barədə məlumat veriblər. Onlardan əlavə, bu bombardmanlarda onlarla digər fələstinli də yaralanıb ki, onların da bəzilərinin vəziyyəti ağırdır.
Sionist rejimnin qırıcıları əl-Bərazil məhəlləsini, Rəfəhin mərkəzindəki Yəbna və əş-Şabura düşərgələrini və bu şəhərin cənubundakı əs-Salam məhəlləsini də bombalayıblar.
Qəzzə zolağının şimalında da 4 nəfər şəhid olub və əş-Şəvbəki ailəsinin Qəzzə zolağının mərkəzində yerləşən əs-Səhabə məntəqəsindəki yaşayış mənzilinin bombalanması zamanı 20-dən çox qadın və uşaq yaralanıb.
Həmçinin Cəbaliya düşərgəsində də Birun-Nəcə məntəqəsində Əbu Zayidə ailəsinə məxsus yaşayış mənzili bombalanıb. Bunun nəticəsində də, 6 nəfər şəhid olub, bir neçə nəfər isə itkin düşüb və yaralanıb.
Bunlardan əlavə, Qəzzə zolağının şimalındakı əl-Avda xəstəxanasının mühasirəsi artıq 3 gündür ki, davam edir. Kamal Udvan xəstəxanası və Beyti Lahiyanın ətraf bölgələri də sionistlərin atəşi altındadır. Hətta tibb işçiləri bir sıra xəstə və yaralıları təcili şəkildə xəstəxanadan çıxarmağa məcbur olublar.