Fələstin Səhiyyə Nazirliyi Qəzzə zolağında sionist rejimi tərəfindən öldürülən uşaqlarla bağlı ən son statistikanı dərc etməklə bu həcmdəki qətlləri “sarsıdıcı və sistematik” adlandırıb.
“Qəzzə bəşər vicdanının qəbirsanlığı olub.” Bunu “Uşaqları xilas edin” təşkilatı bildirib və Qəzzədə uşaq qətliamı barədə xəbərdarlıq edərək qeyd edib: “Fələstinli uşaqlar bobardmanların və mühasirənin davam etməsindən əziyyət çəkirlər. Biz onların ağrı-acılarının adi hala çevrilməsini qəbul etmirik.”
Qəzzə zolağındakı Fələstin Səhiyyə Nazirliyi də dünən, Qəzzə zolağında baş verən soyqırım boyunca şəhid olan uşaqlarla bağlı son statistikanı açıqlayaraq, onların sayının 16503 nəfərə çatdığını bildirib.
Səhiyyə Nazirliyinin dərc olunan bəyanatında müxtəlif yaş qruplarında şəhid olmuş uşaqların sayı ilə bağlı təfərrüat qeyd olunub:
Südəmər (1 yaşdan aşağı) – 916 şəhid
1-5 yaşlı uşaqlar – 4365 şəhid
6-12 yaşlı uşaqlar – 6101 şəhid
13-17 yaşlı yeniyetmələr – 5124 şəhid
Fələstin Səhiyyə Nazirliyi bildirib: “Bu dəhşətli statistika Fələstin cəmiyyətinin ən zəif və günahsız təbəqələrinin birbaşa və sistemli şəkildə hədəfə alındığını göstərir.”
Nazirliyin bəyanatının davamında qeyd olunub: “Bu ağrılı rəqəmlər təkcə itirilmiş günahsız canların sayını deyil, həm də bütöv bir nəslə qarşı törədilmiş insanlıq faciəsinin və cinayətinin miqyasını əks etdirir; elə bir nəsil ki, qorunmağa, qayğıya və təhsilə layiq idi, raketlərin və tank güllələrinin hədəfinə çevrilməyə yox.”
Bu nazirlik beynəlxalq ictimaiyyəti, insan haqları təşkilatlarını və humanitar qurumları öz hüquqi və mənəvi öhdəliklərini yerinə yetirməyə çağıraraq, bu təcavüzü dərhal dayandırmaq üçün tədbir görməyə və işğalçı rejimin liderlərini uşaqlara və müdafiəsiz mülki şəxslərə qarşı törətdikləri cinayətlərə görə məsuliyyətə cəlb etməyə çağırıb.
Bir neçə gün əvvəl sionist rejimin Demokratlar Partiyasının sədri Yaair Qolan qalmaqallı açıqlamasında etiraf etib ki, işğalçı ordu Qəzza uşaqlarını əyləncə naminə öldürür, bu isə sionistlərin qəzəbinə səbəb olub.
O bildirib: “Ağıllı bir dövlət mülki insanlarla müharibə aparmaz, uşaqları əyləncə kimi qətlə yetirməz və zorakı köçürməyə əsaslanan məqsədlər güdməz.”
BMT isə xəbərdarlıq edib ki, qarşıdakı iki gün ərzində Qəzzədə 14 min uşaq ölüm riski ilə üz-üzədir və onlara təcili ərzaq və tibbi yardım çatdırılmalıdır.
Əlaqədar xəbərlər
