İsrailin Qəzzə zolağına hücumlarının 22-ci aya girdiyi bir vaxtda Qəzzə Səhiyyə Nazirliyi bu qanlı müharibədə şəhidlərin sayının 60 mini keçdiyini açıqlayıb.
Xarici KİV-in verdiyi məlumata əsasən, Qəzzə zolağının Səhiyyə Nazirliyi dünən günorta (çərşənbə günü) son statistik hesabatında İsrailin bölgənin müxtəlif bölgələrinə hücumlarının davam etdiyini və təkcə son 24 saat ərzində 113 şəhid və 637 yaralının Qəzzə xəstəxanalarına köçürüldüyünü açıqlayıb.
Yerli mənbələrə görə, yardım və mülki müdafiə qrupları bir çox bölgələrdə zərərçəkənlərə kömək edə bilmir, naməlum sayda insan hələ də dağıntılar altında və ictimai keçidlərdə qalıb.
Bu hesabata görə, 2023-cü il Oktyabrın 7-də müharibə başlayandan indiyədək qeydiyyatda olan şəhidlərin ümumi sayı 60 034 nəfərə çatıb, 145 870 nəfər isə yaralanıb.
2025-ci il Martın 18-dən (yəni son 139 gündə) yeni şəhidlərin sayı 8867, yaralıların sayı isə 33829-a çatıb.
Bu rəsmi statistikaya görə, təkcə son 24 saat ərzində 22 Fələstin vətəndaşı yemək sıralarında şəhid olub, 199-dan çox insan isə yemək alarkən yaralanıb.
BMT və monitorinq təşkilatlarının məlumatına görə, Qəzzədə humanitar vəziyyət “aclıq böhranı” mərhələsinə çatıb. On minlərlə insan ağır qidalanma və yoluxucu xəstəliklər riski altındadır.
Beynəlxalq təhlillərə görə, qeydə alınan şəhidlərin yarıdan çoxu qadın və uşaqlardır.
Qətər və Misirin vasitəçiliyi ilə davamlı atəşkəs üçün dolayı danışıqlar davam edir, lakin indiyə qədər nəticəsiz qalıb.
Qəzzənin əsas infrastrukturu, o cümlədən sağlamlıq, su, kanalizasiya və elektrik enerjisi demək olar ki, tamamilə sıradan çıxıb.