Sionist rejimin Qəzzə zolağına təcavüzü hələ də davam edir və bu da şəhid və yaralıların sayının artması ilə nəticələnir.
Xarici KİV-in çərşənbə axşamı verdiyi məlumata görə, Qəzzədəki Fələstin Səhiyyə Nazirliyi son 24 saat ərzində bölgədə 40 nəfərin şəhid olduğunu, 208 nəfərin isə yaralandığını açıqlayıb.
Bu hesabata görə, 2025-ci il Martın 18-dən Qəzzəyə qarşı təcavüzün yeni mərhələsi başlayandan indiyədək 4240 nəfər şəhid olub, 12860 nəfər isə yaralanıb.
Fələstin Səhiyyə Nazirliyi açıqlamasında bildirib ki, (çərşənbə axşamı) səhər saatlarında Rəfəhin “əl-Elm” bölgəsində yardım paylanması üçün müəyyən edilmiş ərazidə İsrail rejimi cinayət törədərək yardım gözləyən fələstinli vətəndaşlara hücum edib. Nəticədə 27 nəfər şəhid olub, 90 nəfər isə yaralanıb, onlardan bəzilərinin vəziyyəti ağırdır.
İsrail ordusu Qəzzə zolağının şimal hissələri və Qəzzə şəhərində hava və topçu hücumlarını gücləndirib. Bu, atəşkəs danışıqlarının tıxanması ilə eyni vaxtda baş verir. Güclü bombardmanlar, evlərin və yaşayış binalarının dağıdılması, həmçinin işğalçı ordunun Qəzzənin şimal sakinlərinə ərazini tərk etmələri barədə verdiyi göstərişlərin hamısı onları bölgənin cənubuna köçürmək məqsədi daşıyır. İşğalçılar şimal Qəzzəni ardıcıl bombardman və dağıntılarla boşaltmağa və fələstinlilərin köçürülməsi planını həyata keçirməyə çalışırlar.
Fələstin mənbələri bildirib ki, Qəzzə zolağının mərkəzində məcburi köçkünlərin düşərgəsi bombalanıb və 3 nəfər şəhid olub, onlarla insan isə yaralanıb. Həmçinin İsrail ordusunun helikopterləri Qəzzənin cənubundakı Xan Yunus şəhərinin ətrafına hücum edib.
İsrail ordusunun topçuları Xan Yunus şəhərində “Məvasi” bölgəsini intensiv atəşə tutub, nəticədə bir neçə nəfər yaralanıb. Fələstin mənbələri həmçinin işğalçıların Qəzzə şəhərinin şərq hissəsinə atəş açdıqlarını bildiriblər.
Əlaqədar xəbərlər
