İşğalçı İsrail ordusu Qəzzədə soyqırım müharibəsi fonunda 36 xəstəxananı dağıdıb.
Xarici KİV-in verdiyi məlumata görə, Qəzzə zolağındakı hökumətin media ofisi İsrail ordusunun Qəzzədə soyqırım müharibəsi zamanı qəsdən 36 xəstəxananı dağıdaraq xidmətdən çıxardığını və bu dağıntıların bölgədəki səhiyyə sistemini tamamilə məhv etmək üçün planlaşdırılmış planın bir hissəsi olduğunu açıqlayıb.
Bu hesabata görə, işğalçılar onlarla tibb məntəqəsi və səhiyyə ocaqlarını da hədəfə alıblar. Bu, tibb müəssisələrinin hədəfə alınmasını qadağan edən bütün beynəlxalq qanunları və Cenevrə Konvensiyalarını açıq şəkildə pozan bir hərəkətdir.
Bu xəstəxanaların başında Qəzzə şəhərindəki əş-Şifa Tibb Mərkəzi, Xan Yunisdəki Nasir Tibb Kompleksi, Rəfəhdəki Əbu Yusif ən-Nəccar xəstəxanası, İndoneziya xəstəxanası, Kamal Üdvan xəstəxanası, Beyt Hanun xəstəxanası və Qəzzənin şimalında əl-Ovdə xəstəxanasının adları var.
Siyahıda bir neçə uşaq xəstəxanasının da adı var.
Soyqırım müharibəsi başlayandan bəri işğalçı ordu Qəzzə zolağının hər yerindəki tibb mərkəzlərini qəsdən hədəfə alıb və bu, onların əksəriyyətinin xidmət göstərmə imkanlarının dayanması ilə nəticələnib. Eyni zamanda, bütün tibbi və humanitar təchizatlar da kəsilib və bu da səhiyyə müəssisələrinə qarşı hücumları bu soyqırım müharibəsinin ən bariz nümunələrindən birinə çevirib.
Həftənin bazar günü işğalçı ordu Qəzzə zolağının şimalındakı əl-Məmədani xəstəxanasını növbəti dəfə bombalayıb.
Yerli hökumət idarəsinin bəyanatına əsasən, işğalçı rejimin qırıcı təyyarələri iki raket ataraq Qəzzə şəhərində yerləşən əl-Məmədani xəstəxanasının qəbul və təcili yardım binasını hədəfə alıblar.
Bu bombardman nəticəsində əl-Məmədani xəstəxanası xidmət göstərmək imkanını itirib, təcili yardım bölməsi tamamilə məhv edilib, qəbul, laboratoriya və aptek bölmələri ciddi zərər görüb.
İşğalçı ordu tibb işçilərini və qaçqınları yaralı xəstələri təxliyə etməyə məcbur edib. Yayımlanan görüntülər göstərir ki, qaçqınlar xəstələri xəstəxana çarpayıları ilə küçələrə daşıyırlar ki, bu da olduqca ağır və faciəvi bir vəziyyətdən xəbər verir.
Qəzzədəki Hökumət Media İdarəsi bildirib ki, bu xəstəxana Qəzzənin mühüm və qədim müalicə müəssisələrindən biri olub və bir milyondan çox insana tibbi xidmət göstərirdi.
Bu tibb mərkəzi çoxsaylı ixtisaslaşdırılmış bölmələri özündə birləşdirirdi və hücum zamanı xəstəxanada yüzlərlə xəstə, yaralı, tibb işçisi və xəstənin yaxınları mövcud idi. Əl-Məmədani xəstəxanası soyqırım müharibəsi, mühasirə və davamlı bombardman nəticəsində səhiyyə sisteminin demək olar ki, tamamilə çökdüyü bir şəraitdə Qəzzə vilayətləri və Şimali Qəzzə sakinlərinə xidmət göstərirdi.
Bu, işğalçı ordunun əl-Məmədani xəstəxanasına ilk hücumu deyil. Daha əvvəl də bu tibb mərkəzində dəhşətli bir cinayət törədilmişdi ki, bu da yüzlərlə mülki şəxsin şəhid olmasına və yaralanmasına səbəb olmuşdu.