Qəzzə zolağındakı Fələstin Səhiyyə Nazirliyi ötən həftənin bazar ertəsi bildirib ki, sionist rejimi uşaq iflicinə qarşı peyvəndlərin bu bölgəyə daxil olmasına mane olur və indiyədək bu rejimin hücumları nəticəsində 16 mindən çox uşaq şəhid olub.
Xarici KİV-in verdiyi məlumata görə, Qəzzə zolağındakı Fələstinin Səhiyyə Nazirliyi yayımladığı bəyanatda bildirib: İşğalçı rejim yalnız dinc sakinləri ölümcül silahlarla hədəfə almaqla kifayətlənmir, eyni zamanda Qəzzə zolağında yaşayan 2 milyondan çox insanı aclıq içində saxlayır.
Nazirlik əlavə edib: “Qəzzədəki uşaqlar ya bombardmanlar nəticəsində, ya da qida çatışmazlığı, dərman və tibbi xidmətin olmaması səbəbilə həyatlarını itirirlər. Şəhid olan uşaqların sayı bu bölgədə 16 min nəfəri keçib. Sionist rejim uşaqları və hamilə qadınları bütün tibbi ehtiyaclar və müalicə imkanlarından məhrum edib. Bu rejim hələ də Qəzzəyə uşaq iflicinə qarşı peyvəndlərin girişinə mane olur və bu, xəstəliklə mübarizə səylərini ciddi şəkildə təhlükə altına alır.”
Səhiyyə Nazirliyi, həmçinin bildirib: İndiyədək Qəzzədə 57 uşaq qida çatışmazlığı səbəbilə həyatını itirib. Qəzzə uşaqları sığınacaqsız qalıb və fəlakətli şəraitdə yaşayırlar. Biz dünya azadsevərlərinə səslənirik: Qəzzə uşaqlarını xilas etmək bir seçim deyil, təcili bir insanlıq vəzifəsidir.
Bundan əvvəl, Fələstindəki UNİCEF fondunun sözçüsü Kazım Əbu Xələf bəyan etmişdi ki, Qəzzə zolağındakı humanitar vəziyyət böhran həddinə çatıb və onlarla uşaq artıq qida çatışmazlığı səbəbilə həyatını itirib.
Əbu Xələf Qəzzəyə təcili humanitar yardımın çatdırılmasının zəruriliyinə toxunaraq, beynəlxalq bir mexanizmin yaradılmasını tələb edib ki, bu da İsrail rejiminə təzyiq göstərərək ərzaq və dərmanların bu bölgəyə çatdırılmasını asanlaşdırsın.
O, həmçinin xəbərdarlıq edib ki, Qəzzədə minə yaxın hamilə qadın qida maddələrinin və tibbi müalicənin olmaması səbəbindən ciddi risk altındadır və onların dərhal tibbi müdaxiləyə ehtiyacı var.
Bu xəbərdarlıqlar elə bir vaxtda verilib ki, Qəzzə zolağı hələ də ciddi mühasirə altındadır və yardım təşkilatlarının əhaliyə köməyi işğalçı qüvvələrin geniş məhdudiyyətləri ilə üz-üzədir.
Məlumatlara əsasən, Qəzzənin bir çox bölgəsində ərzaq, dərman və tibbi xidmətlərdə ciddi çatışmazlıqlar yaşanır. Beynəlxalq humanitar yardım təşkilatları isə yardımların səmərəli şəkildə paylanmasında acizliklərini bildirirlər.
