Bəzi mənbələr yaxın günlərdə atəşkəs razılaşmasının yekunlaşma ehtimalı barədə məlumat verdiyi halda, sionist rejim Qəzzənin müxtəlif bölgələrini qırıcı və pilotsuz uçuş aparatları ilə şiddətli şəkildə atəşə tutub və bir neçə fələstinli də həyatını itirib.
Xarici KİV-in verdiyi məlumata görə, Qəzzə müharibəsinin 642-ci günündə İsrail rejiminin bölgəyə hücumları daha bir neçə fələstinlinin şəhid olması ilə nəticələnib.
Fələstin mənbələri bugün səhərdən etibarən Qəzzənin hər yerində rejimin hücumları nəticəsində ən azı 16 nəfərin şəhid olduğunu açıqlayıb.
Əl-Əqsa Şəhidləri Xəstəxanasındakı mənbələr də işğalçıların bombardmanı zamanı Qəzzənın mərkəzindəki Deyr əl-Bələhdə iki fələstinlinin şəhid olduğunu bildirib.
Nasir Tibb Mərkəzinin mənbələri, həmçinin Qəzzənin cənubundakı Xan Yunisin qərbindəki qaçqın düşərgəsinə işğalçı qüvvələrin pilotsuz təyyarələrin hücumu zamanı çoxlu sayda fələstinlinin şəhid olması və yaralanması barədə məlumat verib.
Digər tərəfdən, İsrail rejimi hərbiçiləri Qəzzə şəhərinin cənub-şərqindəki əz-Zeytun məhəlləsində yaşayış binalarını partladıb, Qəzzənin şimalında isə Cəbaliyanın şərqində yaşayış binalarını dağıdıb.
Fələstin mənbələri Qəzzə şəhərinin qərbindəki “Şati” düşərgəsindəki “Bələxiyyə” bölgəsində 5 şəhidin cənazəsinin dağıntılar altından çıxarıldığını bildirərək, İsrail rejiminin Qəzzənin qərbindəki “Şati” düşərgəsindəki bir evə hücumu zamanı 8 nəfərin şəhid olduğunu, 30-dan çox insanın isə yaralandığını açıqlayıb.
Bu arada Əl-Ərəbi telekanalı İsrail rejiminin Qəzzədə yaşayış məhəllələrinə çərşənbə axşamı çox şiddətli hücumları zamanı 100-ə yaxın insanın şəhid olduğunu bildirib. Partlayışların intensivliyi o həddə çatıb ki, bir çox ailələr tamamilə dağıntılar altında qalıb və xilasetmə qrupları dağıntılar arasında axtarış aparır, humanitar vəziyyət isə fəlakətlidir.