Qəzzə, sakinlərinin səssizcə ölümünün səhnəsi olmaqda davam edir. Tibbi mənbələrin məlumatına görə, aclıq son 24 saatda ikisi uşaq olmaqla, daha 14 nəfərin həyatına son qoyub.
Xarici KİV-in dünən verdiyi məlumata əsasən, Qəzzə zolağındakı xəstəxanalar son 24 saat ərzində aclıq və qida çatışmazlığından ikisi uşaq olmaqla, 14 yeni ölüm faktı qeydə alıb.
Fələstinin xəbər agentliyi bildirib ki, son statistik məlumatlara görə, Qəzzədə aclıq və qida çatışmazlığından ölənlərin ümumi sayı 147-yə çatıb, onlardan 88-i uşaqdır.
İşğalçı İsrail qüvvələrinin davam etdirdiyi mühasirə nəticəsində Qəzzədə humanitar böhran kritik mərhələyə çatıb. Birləşmiş Millətlər Təşkilatının Yardım və İşlər üzrə Agentliyi (UNRWA) 5 yaşından kiçik uşaqlar arasında qida çatışmazlığının Mart ayından İyun ayına qədər iki dəfə artdığı barədə xəbərdarlıq edib.
Ümumdünya Səhiyyə Təşkilatı (ÜST) də Qəzzədə qida çatışmazlığının böhran səviyyəsinə çatdığını, yardım çatdırılmasında gecikmələrin və mühasirənin davam etməsinin çox sayda insanın həyatını itirməsinə səbəb olduğunu açıqlayıb. Təşkilatın məlumatına görə, Qəzzə şəhərində 5 yaşından kiçik uşaqların təxminən beşdə biri kəskin şəkildə qida çatışmazlığından əziyyət çəkir.
BMT baş katibinin humanitar məsələlər üzrə müavini və fövqəladə hallar üzrə koordinatoru Tom Fletcher “Qəzzada hər üç nəfərdən biri günlərlə yemək yemir” deyib.
Fletçer Qəzzədə humanitar vəziyyətlə bağlı açıqlamasında “Qəzza dünyanın gözü qarşısında humanitar böhran içindədir. Qida almağa çalışan insanlar hədəfə alınır və uşaqlar acından ölür” deyib.
O, yardımların dayandırılmaması, gecikdirilməməsi və ya hücum altında paylanmaması və yardım karvanlarının sərhədləri sürətlə keçməsinə icazə verilməli olduğunu söyləyərək, qida əldə etməyə çalışan insanların hədəfə alınmasına son qoymağa çağırıb.
Əlaqədar xəbərlər
