İsrail rejiminin keçmiş baş naziri Qəzzə xalqına qarşı müharibənin davam etməsinin səbəbini Netanyahunun şəxsi və siyasi maraqları ilə əlaqələndirib.
Xarici KİV-in verdiyi məlumata görə, İsrail rejiminin keçmiş baş naziri Ehud Olmert, “Foreign Policy” jurnalına verdiyi müsahibədə bildirib ki, artan sayda israilli hesab edir ki, Benyamin Netanyahunun Qəzzə müharibəsinin davam etdirilməsi qərarlarının kökündə onun şəxsi və siyasi maraqları dayanır.
Olmert, Netanyahu kabinetinin yanaşmasını tənqid edərək bildirib: Bütün girovların azad edilməsi üçün yeganə real və mümkün yol İsrailin atəşkəsə sadiq qalması və müharibənin tam dayandırılmasıdır.
O, bundan əvvəl verdiyi müsahibədə vaxtından əvvəl seçkilərin keçirilməsini tələb etmiş və demişdi: Əminik ki, seçkilər keçirilsə, Netanyahunun hökuməti devriləcək.
O, qeyd etmişdi ki, israillilərin əksəriyyəti müharibənin bitməsini istəyir və hökumətdən qanlı toqquşmalara tezliklə son qoymasını tələb edir.
Olmert, həmçinin kabinetin sağçı nazirləri İtmər Ben-Gvir və Betselail Smotriçin sərt mövqelərini məsuliyyətsiz və işğal olunmuş ərazilərdə real təmsilçiliyi olmayan fikirlər kimi qiymətləndirib.