Fələstin müqavimət qrupları bu gün – şənbə günü yaydıqları bəyanatda bildiriblər ki, Qəzza zolağında baş verən aclıq və soyqırımı cinayətləri ABŞ-ın birbaşa himayəsi və ortaq iştirakı ilə, beynəlxalq ictimaiyyətin susqunluğu fonunda və Avropa İttifaqının açıq siyasi və diplomatik dəstəyi ilə baş verir. Bəyanatda Aİ “sionist rejimə utandırıcı dərəcədə tərəfkeşlik edən” qurum kimi xarakterizə olunub.
Qruplar vurğulayıblar ki, Qəzza zolağındakı Fələstin xalqı artıq 21 aydan çoxdur ki, soyqırımı və etnik təmizləmə ilə müşayiət olunan vəhşi bir müharibə ilə üz-üzədir. Bu cinayətlər sistemli bombardmanlar, qəsdən həyata keçirilən aclıq siyasəti və həyatın bütün sahələrinin hədəfə alınması ilə müşayiət olunur. Nəticədə kütləvi məcburi köçürülmələr, geniş yayılmış aclıq və xəstəliklər, eləcə də səhiyyə və humanitar sistemin tamamilə çökməsi baş verir. Bu şəraitdə uşaqların, xəstələrin və yaşlıların kütləvi şəkildə həlak olması davam edir.
Qruplar bildiriblər ki, xəstəxanalar dərman, qida və tibbi xidmətin olmaması fonunda aclıq və xəstəlik səbəbilə ciddi yorğunluq və zəiflik keçirən misli görünməmiş sayda fələstinlini qəbul edir. Bu isə onların hər an həyatlarını itirməsi riskini artırır.
Qeyd olunub ki, sionist rejimin bombardmanları təkcə hərbi və ya təhlükəsizlik obyektləri ilə məhdudlaşmır, eyni zamanda kilsələr, məscidlər, məktəblər və xəstəxanalar da hədəfə alınır. Bu cinayətlərə görə tam məsuliyyət ABŞ administrasiyası və “ikiüzlü” beynəlxalq ictimaiyyətin üzərinə düşür. Həmçinin bəyanatda susqun və itaətkar adlandırılan ərəb və müsəlman rejimləri də məsuliyyətə cəlb olunub – onların səssizliyi işğalçı rejimi cinayətlərə davam etməyə təşviq edir.
Bəyanatda vurğulanıb ki, bu gün Qəzzada baş verənlər Qərbin ikiüzlülüyünü ifşa edib və onun “demokratiya” iddialarını puça çıxarıb. Qərb hökumətləri tərəfindən səsləndirilən “insani və əxlaqi” şüarlar yalnız boş sözlər və illüziyalardır.
Müqavimət qrupları ərəb və müsəlman xalqlarını, eləcə də dünyanın azad insanlarını sükutdan çıxmağa, passivlik mövqeyini tərk edərək geniş xalq aksiyalarına başlamağa, sionist, ABŞ və Qərb səfirliklərini mühasirəyə almağa çağırıblar – Qəzzaya və onun müqavimətinə dəstək məqsədilə.
Bəyanat, eyni zamanda, ümmətin alimləri, siyasi və intellektual elitalarına da açıq müraciətlə çıxış edərək, fələstinlilərə qarşı həyata keçirilən soyqırıma dərhal cavab verməyə, konkret və əməli mövqe ortaya qoymağa çağırıb. “Həyat mövqedir və bu gün sizin gündür – Allahın sizdən razı qalacağı davranışları göstərin”, – deyə bəyanatda vurğulanıb.
Bəyanatın sonunda müqavimət qrupları Qəzzada döyüşən fələstinli xalqı “başlarının tacı” adlandıraraq onların qəhrəmanlıqla dirənişini alqışlayıblar. Qeyd olunub ki, bu müqavimət sionist rejimin və onun müttəfiqlərinin planlarını alt-üst edib və bu fədakarlıqlar hədər getməyəcək – əksinə, yaxın gələcəkdə qələbənin toxumlarını səpir.
Bununla yanaşı, Qəzza zolağındakı Hökumət Media İdarəsi də bu gün – şənbə günü – təcili bəyanat yayaraq beynəlxalq ictimaiyyəti, o cümlədən BMT qurumları, beynəlxalq təşkilatlar və insan haqları qurumlarını, bölgədə getdikcə dərinləşən humanitar fəlakəti dərhal dayandırmaq üçün təcili addımlar atmağa çağırıb. Bəyanatda bildirilib ki, bu soyqırım kampaniyasının başladığı gündən – yəni 651 gündür – Qəzza sakinləri qətliam və aclıqla qarşı-qarşıyadırlar.
Bəyanatda vurğulanıb ki, Qəzzada baş verənlər – planlı şəkildə həyata keçirilən kütləvi aclıq – beynəlxalq hüquqa zidd cinayətdir və qəti beynəlxalq reaksiya tələb edir. Bu kontekstdə, humanitar yardımın bölgəyə fasiləsiz və təhlükəsiz şəkildə daxil olmasını təmin etmək üçün beynəlxalq nəzarət altında daimi humanitar dəhlizlərin açılması vacib hesab olunur.
Media idarəsi həmçinin xəbərdarlıq edib ki, humanitar yardımın siyasiləşdirilməsi, ya da işğalçı rejim və onunla əlbir olan tərəflər tərəfindən idarə olunması cinayətdir və dərhal dayandırılmalıdır. Qəzzanın davam edən mühasirəsi isə bütöv bir xalqın kollektiv şəkildə cəzalandırılması anlamına gəlir və heç bir halda əsaslandırıla bilməz.
Bəyanatda beynəlxalq ictimaiyyətə çağırış edilib ki, İsrailin həyata keçirdiyi soyqırım, aclıq siyasəti və zorla köçürməni dayandırmaq üçün güclü və konkret təzyiqlər göstərsinlər. İdarə eyni zamanda, aclıq cinayətləri ilə bağlı təcili beynəlxalq araşdırma aparılmasını və bu cinayətlərdə əli olanların beynəlxalq məhkəmələrdə ədalət qarşısında cavab verməsini tələb edib.
Sonda beynəlxalq ictimaiyyət “sükut və laqeydlik durumunu aşmağa” və Qəzzada hələ də həyatda qalan insanları xilas etmək üçün dərhal hərəkətə keçməyə çağırılıb.
Əlaqədar xəbərlər
