Avropa İttifaqının Xarici Siyasət məmuru sərt bəyanat verərək, sionistlərin fələstinlilərə qarşı qəddarcasına olan hücumlarını və bu rejimin rəhbərlərinin İordan çayının qərb sahillərində qəsəbə salmanın genişləndirilməsinə dair qərarını pisləyib.
Josep Borrell bir nüsxəsi Avropa İttifaqının saytında dərc olunan bəyanatında deyib ki, İttifaq işğal olunmuş Fələstində zorakılıqların artmasından çox narahatdır.
O, sionist rejiminin qeyri-qanuni qəsəbələri yaxınlığındakı Fələstin müqavimət qruplarının cavab hücumlarına işarə edərək deyib: Biz eyni şəkildə israilli köçkünlərin işğal olunmuş İordan çayının qərb sahillərindəki fələstinli mülki şəxslərə qarşı hücumlarını pisləyirik.
Avropa İttifaqının Xarici Siyasət məmuru “(sionistlərin) zorakı hərəkətlərinin indiyə qədər azı bir fələstinlinin ölümü, bir çoxlarının yaralanması və fələstinlilərin mülklərinin kütləvi şəkildə məhv edilməsi ilə nəticələndiyini” bəyan edərək əlavə edib: İşğal altındakı torpaqlarda yaşayan fələstinlilərin qorunmasına zamin olmaq İsrailin vəzifəsidir.
Borrell, həmçinin sionist rejiminin İordan çayının qərb sahillərində qəsəbə salmanın genişləndirilməsinə dair qərarını pisləyərək deyib: Avropa İttifaqının bütün tərəflərdən istəyi budur ki, ölümcül zorakılıq dövrünə son qoymaq, gərginliyi artıran birtərəfli addımları saxlamaq, daha çox insan tələfatının qarşısını almaq və cinayətkarları ədalətə təslim etmək üçün təcili addımlar atsınlar. Münaqişənin sülh yolu ilə həlli üçün göstərilən səylərə qoşulsunlar.
Bu, radikal və silahlı sionist köçkünlərinin zorakılıqlarının davamı olaraq, ötən çərşənbə günü İordan çayının qərb sahillərindəkı Ramullahın şimal-şərqində yerləşən “Tərmsəya” kəndinə hücum edərək fələstinlilərə aid maşın və evləri yandırdıqları bir vaxtda bəyan edilib.
Fələstin Səhiyyə Nazirliyi bildirib ki, bu toqquşmalarda 27 yaşlı Ömər Qətin adlı bir gənc Ramullahın şimal-şərqində yerləşən “Tərmsəya” kəndində köçkünlərlə mübarizədə şəhid olub və onlarla insan yaralanıb.
Fələstin Muxtariyyətinin səfiri Həssam Zəmlət video görüntü yayaraq, İordan çayının qərb sahillərində vəziyyətin ağır olduğu barədə xəbərdalıq edib. O, deyib: Mən sizinlə işğal altındakı Fələstində vəziyyətin təhlükəli və ölümcül mərhələyə çatdığı bir şəraitdə danışıram. İsrail silahlıları işğal altındakı torpaqlarda zorakılıq törətməkdədirlər. Onlar (Fələstin) xalqının həyatına od vurublar və ötən günlər ərzində bir fələstinlini şəhid ediblər.
O, sionistlərin hücumlarını terror adlandırıb. Qərb ölkələri və mediyalarına səslənərək deyib: Belə bir şəraitdə susduğunuz üçün sizə ayıb olsun. Bu hərəkətlər beynəlxalq qanunlara əsasən müharibə cinayətləridir. İsrail cavab verməlidir. Əks halda onların cinayətləri bitməyəcək.
