“Azadlıq Flotilyası Koalisiyası” (FFC) təsdiqləyib ki, Qəzzaya humanitar yardım aparan mülki gəmi – Madleen, bu gün səhər saat 03:02-də (CET vaxtı ilə) beynəlxalq sularda (31.95236° N, 32.38880° E koordinatlarında) sionist rejimin hərbi qüvvələri tərəfindən hücuma məruz qalıb və zorla saxlanılıb.
Silahsız mülki ekipaj qanunsuz şəkildə həbs edilib, gəmidəki uşaq qidası, ərzaq və tibbi ləvazimatlar da daxil olmaqla bütün həyati vacib yardım yükləri müsadirə olunub.
İnsan haqları vəkili və flotilya təşkilatçılarından biri olan Huveyda Ərəf bildirib:
“Sionist rejimin Madleen gəmisində olan beynəlxalq könüllüləri saxlaması üçün heç bir hüquqi səlahiyyəti yoxdur. Bu, beynəlxalq hüququn açıq şəkildə pozulmasıdır və Beynəlxalq Ədalət Məhkəməsinin Qəzzaya humanitar yardımların qarşısının alınmaması ilə bağlı məcburi qərarlarına ziddir. Bu könüllülər nə sionist rejimin yurisdiksiyasına tabedirlər, nə də blokadanı pozmaq və yardım çatdırmaq kimi humanitar fəaliyyətlərinə görə cinayətkar sayıla bilərlər. Onların saxlanılması qanunsuz, əsassız və dərhal dayandırılmalıdır.”
Bəyanatda vurğulanır ki, sionist rejim bir daha tam cəzasızlıqla hərəkət edir. Beynəlxalq məhkəmə qərarlarına məhəl qoymur, Qəzzaya yardım girişini əngəlləyir və mülki gəmiçiliyin qorunması ilə bağlı beynəlxalq hüquq normalarını pozur. Dünya ictimaiyyətinin mühasirəyə və soyqırıma son qoymaq çağırışlarını isə açıq şəkildə rədd edir.
Bu son hücum, öncəki “Conscience” (Vicdan) gəmisinə edilən dron hücumundan sonra ikinci aktdır. Həmin hücum zamanı 4 mülki könüllü yaralanmış, gəmi Avropa sularında yanaraq sıradan çıxmışdı. O zaman da beynəlxalq hüquq pozulmuş, amma heç bir dövlət reaksiya verməmişdi.
Flotilya təşkilatçılarından Tan Safi isə bildirib:
“Dünya dövlətləri ‘Conscience’ gəmisinin bombalanmasına susdu. İndi isə sionist rejim bu susqunluğun sərhədlərini yenidən yoxlayır. Hər keçən saat cəzasızlıq sionist rejimi daha da cəsarətləndirir — həm mülki əhaliyə, həm yardım işçilərinə, həm də beynəlxalq hüququn özünə qarşı daha ağır hücumlar etmək üçün.”
