İşğalçı rejimin Qüds və İrs naziri Meir Brosh, vəzifəsindəki son günündə, işğal altındakı Qüdsün köhnə şəhər hissəsində yerləşən fələstinlilərə məxsus evlər və ticarət obyektlərinin müsadirə olunmasına dair qərar imzalayıb. Bu addımın məqsədi, əmlak sahiblərini məcburi şəkildə didərgin salmaq və Bab əs-Silsilə yolu boyunca, Məscidül-Əqsa istiqamətində, demoqrafik vəziyyəti işğalçılar (yəhudi məskunlaşanlar) xeyrinə dəyişməkdir.
Bu təhlükəli qərar, Broshun Haredi (ultradindar yəhudilərin) hərbi xidmətə cəlb olunması böhranı səbəbilə istefa verməsindən öncə verilib. Qərar, guya “yəhudi məhəlləsi” sərhədləri daxilində yerləşdiyi iddia edilən fələstinli daşınmaz əmlaklarını hədəf alır. “Kan” adlı ivrit kanalı bildirir ki, fələstinlilərin bu ərazilərdən çıxarılması əvvəllər “siyasi həssaslıqlar” səbəbilə təxirə salınmışdı. Lakin Brosh vəzifədən getməmişdən öncə səlahiyyətlərindən istifadə edərək bu addımı atdı – hər hansı bir rəsmi hüquqi rəyi əlavə etmədən, sadəcə nazirliyin hüquq departamentinə bildiriş göndərməklə kifayətləndi.
Qüds sakinləri bu qərarın icrası ilə Bab əs-Silsilə yolunun tam şəkildə yəhudiləşdirilməsinə şərait yaradacağından narahatdırlar. Bu da ərazidəki fələstinlilərin məcburi şəkildə çıxarılması və onların yerinə məskunlaşan yəhudilərin yerləşdirilməsi ilə nəticələnəcək. Bu yolla Məscidül-Əqsa ilə ətraf fələstinli məhəllələri arasında coğrafi və demoqrafik əlaqə kəsiləcək, xüsusilə də Bab əs-Silsilə qapısından gələn müsəlman ibadətçilər üçün yol tamamilə bağlanacaq.
Bu radikal haredi nazir, 28 mayda Knessetdə keçirdiyi çıxış zamanı – guya “Qüdsün birləşdirilməsi günü” münasibətilə – bildirib ki, 1967-ci ildə Qüdsdə yəhudilərin nisbəti 72% idisə, bu gün bu rəqəm 57%-ə enib. O xəbərdarlıq edib ki, bu azalma davam edərsə, “Qüds yəhudi əksəriyyətinə sahib olmayacaq”. Bu çıxışı, onun son qərarı ilə birbaşa əlaqələndirilir: məqsəd, fələstinliləri didərgin salaraq, onların mülklərini ələ keçirmək və yəhudi mövcudluğunu möhkəmləndirməkdir.
Bu addım, xüsusilə Məscidül-Əqsa ətrafında Qüds şəhərinin tamamilə yəhudiləşdirilməsi üçün işğalçı hökumətin apardığı sistemli siyasətin bir hissəsi olaraq qiymətləndirilir. Bab əs-Silsilə yolu, son illərdə işğalçıların basqınlarına qarşı çıxan müsəlman keşikçilərin (rəbat edənlərin) davamlı varlığına şahidlik edib. Elə buna görə də, bu yol yəhudi məskunlaşması üçün əsas hədəf halına gətirilib – boşaldılaraq Məscidül-Əqsaya aparan “müstəsna keçid” kimi formalaşdırılması planlaşdırılır.
Əlaqədar xəbərlər
