Qardian qəzetinin araşdırmaları göstərir ki, işğalçı İsrail ordusu Qəzzənin qərbindəki bir çayxanaya hücumda qadağan olunmuş bombadan istifadə edib.
Real-israil saytının məlumatına görə, Qardian qəzeti xəbər verib ki, işğalçı İsrail ordusu bazar ertəsi Qəzzə sahilindəki bir çayxanaya hücum zamanı 500 funtluq (227 kiloqramlıq) bomba istifadə edib.
Hesabata görə, bu bomba idarəolunmayan və nəzarətsiz silah kimi tanınır, çox güclü partlayış dalğası yaradır və qəlpələri geniş əraziyə yayılır.
Qardian ekspertlərə istinadla yazıb ki, partlayış yerində yaranan böyük krater MK-82 kimi iri və güclü bombadan istifadə edildiyini göstərir.
Beynəlxalq hüquq üzrə ekspertlər isə qəzetə bildiriblər ki, belə sursatlardan istifadə çox güman ki, qanunsuzdur və hərbi cinayət kimi qiymətləndirilə bilər.
Qəzzədə falafel satılan köşkə hava hücumu – 7 şəhid
Digər tərəfdən, çərşənbə axşamı gecə sionist rejiminin Qəzza zolağının mərkəzindəki Nuseyrat qaçqın düşərgəsində bir məktəbin qarşısında toplaşmış dinc sakinlərə hava hücumu nəticəsində 7-dən çox fələstinli, o cümlədən 3 uşaq şəhid olub, bir çoxu isə yaralanıb.
Yerli və tibb mənbələrinin bildirdiyinə görə, insanlar əl-Avda xəstəxanasının yaxınlığındakı bir falafel köşkü yanında toplaşarkən İsrail PUA-sı qəfil hücum edib. Yerli sakinlər adətən gecə bu saatlarda axşam yeməyi almaq üçün həmin köşkə gəlirmiş. Hücum nəticəsində çox sayda insan şəhid olub, tibb briqadaları isə ağır yaralıları müalicə etməkdə davam edirlər.
Əl-Cəzirə xəbər verib ki, xəstəxananın ətrafı qan izləri, dağılmış yemək qalıqları və dağıntılar arasına səpələnmiş ev əşyaları ilə örtülüb. Xilasetmə maşınları, insanların fəryad səsləri arasında yaralıları hadisə yerindən aparmaq üçün tələsiblər.
Əl-Cəzirənin hadisə yerindəki müxbiri canlı reportajda bildirib: “Biz Nuseyrat düşərgəsində əl-Avda xəstəxanasının qarşısındakı əsas küçədə idik; bura həmişə xəstələr, onların yaxınları və hadisələri işıqlandırmağa gələn jurnalistlərlə dolu olur.”
O əlavə edib: “Birdən PUA-dan atılan raket dinc sakinlərin falafel köşkü qarşısındakı sadə toplaşmasını hədəf aldı. Həyəcan və inamsızlıq içində qan gölməçələri və parçalanmış cəsədlərlə dəhşətli mənzərə yarandı.”
Əl-Cəzirənin müxbiri əlavə edib ki, əl-Avda xəstəxanasının təcili yardım maşınları zədələnib, kiçik qəhvə və çay köşkləri ilə yanaşı yaxınlıqdakı bəzi evlər də zərər görüb.
Çərşənbə axşamı səhərindən etibarən Qəzza zolağının müxtəlif bölgələrinə ardıcıl hava hücumları nəticəsində şəhid olan fələstinlilərin sayı 114 nəfəri keçib.
Əlaqədar xəbərlər
