Dünən (15 iyul) səhər tezdən Qəzza zolağında bir neçə bölgəyə İsrail ordusunun həyata keçirdiyi intensiv hava hücumları nəticəsində onlarca fələstinli şəhid olub. Hücumlar yaşayış məhəllələrini, mülki infrastrukturu və qaçqın düşərgələrini hədəfə alıb, nəticədə çoxsaylı qadın və uşaq da daxil olmaqla geniş sayda şəhid və yaralı qeydə alınıb.
Qəzza şəhərində Fələstin Qanunverici Şurasının üzvü Fərəc Ğul hava zərbəsi nəticəsində şəhid olub. Şəhərin müxtəlif əraziləri – Zeytun, Şucaiyyə və Təffah məhəllələri – artilleriya və hava hücumlarına məruz qalıb. Əl-Qüds xəstəxanasının yaxınlığında yerləşən “Əl-Avda 2” binasının bombalanması nəticəsində isə tanınmış nəşid ifaçısı və Quran qarisi Alaa Əzzam ailəsi ilə birlikdə şəhid olub.
Şati qaçqın düşərgəsində Nəssar ailəsinin evi hədəfə alınıb və azı üç nəfər şəhid olub, bir neçə nəfər, o cümlədən uşaqlar yaralanıb. Hücumlar nəticəsində bir çox insan dağıntılar altında qalıb. Sivil müdafiə qüvvələri, xüsusilə Şimali Qəzzədə, xilasetmə işlərini həyata keçirməkdə çətinlik çəkir, çünki İsrail qüvvələri onların hadisə yerinə yaxınlaşmasına imkan vermir.
Xan Yunis şəhərində qaçqın çadırları və yaşayış binaları bombalanıb, bölgədə hərbi texnika ilə müşayiət olunan genişmiqyaslı dağıntılar qeydə alınıb. Cabaliya, Nuseyrat və digər ərazilərdə də hava zərbələri nəticəsində yaşayış binaları yerlə-yeksan edilib.
Qəzza zolağında dünən (15 iyul 2025) 88 fələstinli şəhid olub. 7 oktyabr 2023-cü ildən bəri davam edən hücumlarda ümumilikdə 195 mindən çox fələstinli ya şəhid olub, ya da yaralanıb. On minlərlə insan itkin düşüb, yüz minlərlə şəxs isə evsiz qalıb. Qəzzada hökm sürən aclıq və resurs qıtlığı səbəbilə xüsusilə uşaqlar arasında ölüm halları sürətlə artır.
İsrailin bu sistemli hücumları beynəlxalq hüquq və BMT-nin qərarlarına zidd olaraq davam edir, ABŞ administrasiyasının dəstəyi ilə həyata keçirilən bu təcavüz beynəlxalq ictimaiyyətin səssizliyi fonunda real soyqırım xarakteri daşıyır.
Əlaqədar xəbərlər
