İsrail işğalçı ordusu dünən (15 iyul), çərşənbə axşamı səhər saatlarında Livan torpaqlarına qarşı təcavüzünü artıraraq, ölkənin şərqində yerləşən Bəqaa bölgəsində bir sıra hava hücumları həyata keçirdiyini elan edib.
İşğalçı ordu verdiyi rəsmi açıqlamada, Bəqaa bölgəsindəki əl-Xəribə ərazisində Hizbullahın “hücum qabiliyyətləri ilə əlaqəli” olduğu iddia edilən hədəfləri vurduğunu bildirib. Hədəflərin “Rizvan qüvvələrinin” hərbi infrastrukturlarını gücləndirmə cəhdlərinin qarşısını almaq məqsədi daşıdığı qeyd olunub.
Eyni zamanda, İsrail döyüş təyyarələri Bəqaa bölgəsinin müxtəlif hissələrinə intensiv hava zərbələri endirib. Bölgə üzərində İsrail hərbi aviasiyasının kütləvi uçuşları müşahidə olunub və Livan mediası əl-Xəribə və ətraf ərazilərdəki dağıntıların görüntülərini yayımlayıb.
Digər tərəfdən, İsrail ordusu bazar etrəsi axşam və dünən (15 iyul) səhər saatlarında Livanın cənubunda yerləşən Şəbaa qəsəbəsinin kənarlarına, “Radar” adlı hərbi mövqedən atəş açaraq sərhəd bölgələrindəki hücumlarını davam etdirib.
İsrailin müharibə naziri Yisrael Katz isə bu hücumlar fonunda Livan hökumətini birbaşa hədələyib. O, Hizbullahın Rizvan bölmələri vasitəsilə hücum imkanlarını inkişaf etdirməyə çalışdığını iddia edərək, “İsrail Livan ərazisindəki cavablarını genişləndirməkdən çəkinməyəcək”, – deyə bəyan edib.
Qeyd edək ki, İsrailin Livana qarşı təcavüzü 8 oktyabr 2023-cü ildə başlayıb və 23 sentyabr 2024-cü ildən etibarən açıq müharibəyə çevrilib. Bu günə qədər müharibə nəticəsində 4 mindən çox livanlı şəhid olub, təxminən 17 min nəfər isə yaralanıb.
2024-cü il 27 noyabr tarixində qüvvəyə minən atəşkəs razılaşmasına baxmayaraq, İsrail bu dövrdə təxminən 3 min dəfə atəşkəsi pozub. Bu pozuntular nəticəsində ən azı 223 şəhid və 509 yaralı qeydə alınıb. İsrail, son hücumlar zamanı ələ keçirdiyi cənubdakı bəzi bölgələrdən qismən çəkilsə də, sərhəddəki beş strateji təpəni işğal altında saxlamaqda davam edir.