İvrit dilli TV kanal bu gün (çərşənbə günü) Yəməndəki Səna hava limanının bombalanmasında 10-dan çox qırıcı təyyarənin iştirak etdiyini bildirib.
Bu xəbərə əsasən, işğalçı rejimin baş naziri Benyamin Netanyahu bildirib: “Hərbi hava qüvvələrimiz Səna hava limanını bombalayıb. Kim bizə hücum edərsə, güclü cavab verəcəyik və əgər fərqinə varmasa, daha da güclü cavab verəcəyik.”
İsrailin müharibə naziri Yisrael Katz da əlavə edib: “Daha əvvəl xəbərdarlıq etdiyimiz kimi, husi qüvvələri (Yəmənin Ənsarullah hərəkatı) dəniz və hava mühasirəsinə alınacaq. Biz Yəmən limanlarını bombalamağa davam edəcəyik və Səna hava limanını yerlə-yeksan edəcəyik.”
Sionist rejimin qırıcıları tərəfindən Səna mülki hava limanının bombalanmasından sonra media bu hücumlar nəticəsində hava limanında yaranmış geniş dağıntıların görüntülərini yayımlayıb.
Digər tərəfdən, ivritdilli başqa bir kanal İsrail rejiminin Hərbi Hava Qüvvələrinin sabiq komandanı Eytan Ben Eliyahunun sözlərini nəql edib: “Ordunun Yəmənə qarşı həyata keçirdiyi hücumlar tükəndirici bir müharibənin tərkib hissəsidir. Qəzzə və İranla bağlı siyasi həll yolu olmadan, husilərin (Yəmənin Ənsarullah hərəkatı) hücumlarına yalnız hərbi cavab verilməsi nəticə verməyəcək.”
Bu məlumatda Yəmən mediası bu gün səhər (çərşənbə günü) işğalçı rejimə məxsus qırıcıların Səna beynəlxalq hava limanına hücum etdiyini xəbər verib.
Yəmənin xəbər TV kanallarından biri bildirib ki, İsrailə məxsus düşmən qırıcıları Səna hava limanını 4 dəfə bombalayıb. Bu hücumlar zamanı hava limanındakı gömrük idarəsinin binası, uçuş-enmə zolağı və Yəmən hava yollarına məxsus bir sərnişin təyyarəsi hədəfə alınıb.