Sionist rejimi ordusu bir neçə fələstinli yardım işçisini Qəzzənin cənubunda humanitar yardımları paylamağa çalışdıqları zaman şəhid edib.
Xarici KİV-in verdiyi məlumata görə, şənbə günü səhər saatlarında sionist ordusunun Qəzzə zolağının cənubundakı “Səlahəddin” küçəsində olan mülki bir avtomobilə hücumu zamanı 5 fələstinli şəhid olub.
Fələstinli mənbələr bildiriblər ki, 5 nəfərin hamısı “əl-Əqsa” şirkətinin yardım işçiləri olub və onlar Qəzzə xalqı arasında humanitar yardımları paylamağa çalışıblar.
Məlumatlara əsasən, bu maşını İsrail rejimin dronlarından biri Qəzzə zolağının cənubunda yerləşən Xan Yunis şəhərinin şərq hissəsində hədəfə alıb.
Fələstin mənbələri bu hücumda şəhid olanların 27 yaşlı “Mötəsim Raid Ramazan Əbu Cərad”, 26 yaşlı “Mahmud Əymən Yusif əl-Mucaidə”, 37 yaşlı “Mahmud Basim Mahmud Duhan”, 26 yaşlı “Fəhd İmadəddin İbrahim Əbu Mustafa” olduğunu və şəhidlərdən birinin kimliyinin hələ müəyyən edilmədiyini bildiriblər.
Bir ildən çox vaxt ərzində sionist rejimin hücumları nəticəsində 45 mindən çox fələstinli şəhid olub və minlərlə insan isə yaralanıb. Qəzzə zolağı İsrail rejiminin mühasirəsi altındadır və bu rejimin ordusu yalnız məhdud sayda humanitar yardımların Qəzzə zolağına girişinə icazə verir.