Almaniyanın İsraildəki səfiri İordan çayının qərb sahilində fələstinlilərə qarşı məskunlaşanların zorakılığını kəskin şəkildə pisləyib və bu hücumların dərhal dayandırılmasını tələb edib.
Real-israil saytının “Der Spiegel” jurnalına istinadla verdiyi məlumata görə, Qəzza müharibəsinin başlamasından sonra İsrailin radikal məskunlaşanlarının işğal altındakı Qərb sahilində fələstinlilərə qarşı zorakılıqları artıb.
Almaniyanın İsraildəki səfiri Şteffen Zaybert bu hücumları pisləyib. Diplomat X platformasında (keçmiş Twitter) ingilis dilində yazıb: “Radikal məskunlaşanların zorakılığı qınanmalıdır. Onlar mütəmadi olaraq fələstinli icmaları təqib edirlər və həmin icmalara hücum edirlər. Bu proses dərhal dayandırılmalıdır.”
Zaybert Almaniyanın Ramallahdakı nümayəndəliyinin rəhbəri Oliver Oçanın paylaşımına cavabında bildirib: “Məskunlaşanların genişmiqyaslı zorakılığı və bunun yerli icmalara yaratdığı təzyiq köçkünlüyü artırır. Bu isə həmin icmaların əsas hüquqlarını pozur və dərhal dayandırılmalıdır.”
7 oktyabr 2023-də Fələstin müqavimət hərəkatı HƏMAS tərəfindən başladılan Əl-Əqsa Qasırğası əməliyyatı və ardınca başlayan Qəzza müharibəsindən sonra radikal məskunlaşanlar Qərb sahilində fələstinlilərə qarşı hücumlarını daha da intensivləşdiriblər. Onlar dəfələrlə odlu silah, beysbol dəyənəkləri və daşlarla fələstinli kəndlərə hücum edib, evləri və avtomobilləri yandırıb, zeytun bağlarını məhv ediblər.
Hadisələrin şahidlərinin sözlərinə görə, İsrail qüvvələri bu cür hücumlara getdikcə daha az müdaxilə edir, bəzən isə hücum edənləri açıq şəkildə dəstəkləyir.
Yaxınlarda Almaniyanın 13 keçmiş səfiri hökumətə müraciət edərək İsrailin işğalçılığına və fələstinlilərin çıxarılmasına qarşı daha sərt tədbirlər görməyi, beynəlxalq hüququ gücləndirməyi tələb ediblər.
Bu sabiq diplomatlar İsrailin Qəzza müharibəsindəki davranışını tənqid edib, Qəzza zolağında fələstinlilərin humanitar vəziyyətini dözülməz adlandırıb və Almaniyanın İsrailə silah ixracının yenidən nəzərdən keçirilməsinə dəstək ifadə ediblər.