İsrail hərbiçiləri “Hənzələ” gəmisinin göyərtəsinə basqın edərək, beynəlxalq hüquq müdafiəçilərinin zolağın blokadasını yarmaq üçün Qəzzəyə daxil olmasına növbəti dəfə mane olublar.
Xarici KİV-in verdiyi məlumata görə, İsrail ordusu bölgənin 17 illik mühasirəsini yarmaq üçün Qəzzə zolağının sahillərinə doğru hərəkət edən “Hənzələ” gəmisinə bazar günü səhər saatlarında basqın edərək, onu ələ keçirib və nəzarəti ələ alıb.
Gəmidə müxtəlif millətlərdən olan 21 beynəlxalq fəal, o cümlədən Avropa parlamentlərinin üzvləri, sənətçilər və jurnalistlər olub və “Azadlıq Donanması Koalisiyası”nın Qəzzə mühasirəsini yarmaq üçün qlobal kampaniyası çərçivəsində yola düşmüşdü. Gəminin hərəkəti koalisiyanın YouTube hesabında canlı yayımlanıb, hətta onun hərəkətinin radar görüntüləri də yayılıb.
İsrail mənbələrinin verdiyi məlumata görə, rejimin “Komando 13” kimi tanınan xüsusi dəniz birliyi bir neçə sürətli qayıqla gəmiyə hücum edərək, göyərtəyə çıxıb və dərhal müşahidə kameralarını sıradan çıxarıb. Daha sonra gəminin Aşdod limanına köçürüləcəyi və bütün sərnişinlərinin həbs edilərək işğal olunmuş Fələstindən deportasiya ediləcəyi açıqlanıb.
Bu aksiyadan əvvəl Qəzzənin Mühasirəsinə Son Verən Beynəlxalq Komitə xəbərdarlıq etmişdi ki, etiraz edilərsə və gəmi ələ keçirilərsə, gəmidəki bütün sərnişinlər müddətsiz aclıq aksiyası keçirəcəklər. Komitə, həmçinin İsrail pilotsuz təyyarələrinin gəminin üzərində uçuşu barədə məlumat verib və İsrailin bəzi xarici hökumətlər vasitəsilə gəmini ələ keçirmək niyyətini bildirən mesajlar göndərdiyini vurğulayıb.
Azadlıq Donanmasının Rəhbər Komitəsinin üzvü Huveyda Əraf müsahibədə İsrailin təhdidlərinin ciddi olduğunu və Qəzzədə mühasirəni yarmaq üçün hər hansı simvolik və ya praktiki cəhdin qarşısını almaq məqsədi daşıdığını bildirib.
İşğalçı İsrail rejimi “Hənzələ” gəmisinin Qəzzəyə çatmasına icazə verməyəcəyini açıqlamış və 2010-cu ildə Fələstin sahilləri yaxınlığında “Mavi Mərmərə” gəmisinə edilən və 10 türk vətəndaşının ölümü və göyərtəsində olan digər fəalların həbsi ilə nəticələnən hücum da daxil olmaqla, keçmişdə etdiyi kimi, lazım gələrsə, güc tətbiq edəcəyi ilə hədələmişdi.
“Hənzələ” gəmisi 2007-ci ildən mühasirədə olan və müharibədən əziyyət çəkən Qəzzə zolağına İsrail rejiminin blokadasını aradan qaldırmaq məqsədi ilə üzən Azadlıq Donanmasının 37-ci gəmisidir.
İyunun 9-da zolağa humanitar yardım çatdırmaq üçün yola çıxan “Madeleine” İsveç gəmisi beynəlxalq sularda İsrail donanması tərəfindən ələ keçirilib. Həmin gəmidə həmçinin bir sıra Avropa ölkələrindən olan fəallar, o cümlədən isveçli yeniyetmə “Greta Gottberg” olub və insan haqları təşkilatlarının xəbərdarlıqlarına baxmayaraq, gəmi Aşdod limanına köçürülüb və sərnişinləri deportasiya edilib.
Əlaqədar xəbərlər
