Fələstin Təhsil Nazirliyi sionist rejiminin ordusunun Qəzzə zolağına və İordaniyanın qərb sahillərinə olan hücumlarında minlərlə fələstinli şagird, tələbə və müəllimin şəhid olduğunu açıqlayıb.
Xarici KİV-in verdiyi məlumata görə, Fələstin Təhsil Nazirliyi çərşənbə axşamı (2 İyul) günü bildirib ki, İsrail müharibə başlayandan indiyə qədər Qəzzə zolağında və İordaniyanın qərb sahillərində 8672 fələstinli şagird və tələbəni şəhid edib.
Nazirlikdən verilən məlumatlar göstərir ki, Qəzzə zolağında şəhid olan şagird və tələbələrin sayı 8572 nəfərə çatıb və digər 100 nəfər isə İordaniyanın qərb sahillərində şəhid edilib.
Bu hesabata əsasən, 14809 fələstinli şagird və tələbə Qəzzədə, 494 nəfər isə İordaniyanın qərb sahillərində yaralanıb.
Fələstin Ali Təhsil Nazirliyi də işğal olunmuş ərazilərdə müharibə başlayan vaxtdan indiyə qədər 497 fələstinli müəllim və Fələstindəki universitet və məktəb işçisinin şəhid olduğunu, digər 3402 nəfərin isə Qəzzədə və İordaniyanın qərb sahillərində yaralandığını açıqlayıb.
Verilən məlumata görə, işğal olunmuş Fələstində müharibənin başlaması 620 minə yaxın şagirdi təhsildən və həmçinin 39 min şagirdi isə ilin son imtahanlarından məhrum edib.
Bu hesabatda, həmçinin 353 dövlət məktəbinin və universitetin, BMT-nin Qəzzə zolağında fələstinli qaçqınlar üçün inşa etdiyi 65 məktəbin sionist rejiminin hücumları nəticəsində tamamilə və ya qismən dağıdıldığına işarə olunub.
Qəzzə zolağında müharibənin başlaması ilə məktəb və universitetlərdəki təhsil dayandırılıb ki, bəlkə, bu yolla fələstinli şagird və tələbələr sionist rejiminin Qəzzə zolağına qarşı dağıdıcı hücumlarından canlarını sağ qurtarsınlar.
Sionist rejimi ordusunun Qəzzə zolağına qarşı hücumlarında indiyədək 38 mindən çox insan şəhid olub. Qəzzə Səhiyyə Nazirliyinin açıqlamasına görə, şəhid olanların əksəriyyəti qadın,uşaq və yaşlı insanlardır.