İşğalçı ordunun keçmiş danışıqlar və böhran idarəetmə bölməsinin rəhbəri Doron Hedar hesab edir ki, “İsrail” Qəzzaya qarşı təxminən iki illik müharibədən sonra “misilsiz bir uçuruma” yuvarlanıb. Bu uçurum, Qəzza zolağında mülki insanları təhdid edən aclıq, dünyanı sarsıdan görüntülər, geniş beynəlxalq qınamalar, müqavimətin əlində qalan təxminən 50 israilli əsir, işğalçı qüvvələrin partlayıcı qurğular müharibəsində tükənməsi və heç bir qarşılıq əldə edilmədən elan edilən “humanitar atəşkəs”lə özünü göstərir.
Bu gün dərc etdiyi məqalədə Hedar belə soruşdu: “Necə oldu ki, bu nöqtəyə gəldik?” O, izah edib ki, təzyiq vasitələri (danışıqlarda “çubuq və kök” adlanan) artıq təsirini itirib. Bu vasitələrə Həmasa “itki qiyməti” ödətdirmək üçün hərbi gücdən istifadə, daxili təzyiq yaratmaq məqsədilə əhaliyə təzyiq göstərmək və 7 Oktyabr hücumundan sonra “İsrail”in qazandığı beynəlxalq legitimlikdən faydalanmaq daxildir.
Hedar bildirib ki, hərbi səviyyə 2024-cü ilin sonlarında “Gideon Arabaları” planı çərçivəsində sui-qəsdlərin həyata keçirilməsi və zolaqda genişmiqyaslı infrastruktur dağıntısı ilə zirvəyə çatdı. Lakin bu, əksinə, fələstinlilərlə birbaşa təmaslara səbəb oldu və Həməsə işğalçı qüvvələrə qarşı xüsusi əməliyyatlar həyata keçirməyə imkan verdi. Bu isə xüsusilə partlayıcı qurğular və idarəolunan raketlər nəticəsində çoxlu sayda əsgərin ölümünə gətirib çıxardı. O, canlı əsirlərin hərbi güclə azad edilməsinin artıq real olmadığını, yeganə yolun əsir mübadiləsi sazişi bağlamaq olduğunu vurğuladı.
Hedarın sözlərinə görə, Qəzzadakı fələstinlilərə göstərilən təzyiq müəyyən məqsədlərə çatdı, lakin Həmasın mövqeyini dəyişməyə vadar etmədi. Müharibənin əvvəlində “İsrail”ə siyasi örtük verən beynəlxalq alət isə bu gün onun ifadəsilə “təcrid və geniş qınama”ya çevrilib. O, vurğulayıb ki, qlobal mediada aclıqdan əziyyət çəkən uşaqların görüntüləri “minlərlə İsrail bəhanəsindən” daha güclüdür və əgər aclıq davam edirsə, yardımların zolağa daxil olması işğalçıya heç bir fayda vermir.
Hedar sonda xəbərdarlıq edib ki, İsrailin hazırda Dohada davam edən danışıqlarda ləngiməsi “strateji fəlakət”ə gətirib çıxaracaq – yəni əsirlər geri alınmadan müharibənin məcburi şəkildə başa çatması. O, “gec olmadan Həmasla tam və hərtərəfli razılaşmaya getməyə” çağırıb.