Hücum Tehranın siyasi məhbuslar üçün ən məşhur həbsxanasında inzibati binanı dağıdıb
İsrailin 23 iyunda Tehrandakı Evin həbsxanasına endirdiyi zərbə nəticəsində 71 nəfər həlak olub. Bu barədə bazar günü İran məhkəmə sisteminin sözçüsü Əsgər Cahangir məlumat verib.
İsrail və İran arasında 12 günlük müharibənin bitməsinə iki gün qalmış İsrail Hərbi Hava Qüvvələri İran paytaxtının siyasi məhbuslar və xarici vətəndaşların saxlanıldığı ən məşhur həbsxanasına hücum edib.
Şimal Tehrandakı geniş və möhkəmləndirilmiş kompleksə hücum İsrailin hədəflərini hərbi və nüvə obyektlərindən çıxarıb, İran hakimiyyətinin simvolik mərkəzlərinə qədər genişləndirdiyini göstərib.
Cahangirin sözlərinə görə, “Evin həbsxanasına edilən hücumda inzibati işçilər, hərbi xidmətini çəkən gənclər, məhbuslar, onlara baş çəkməyə gəlmiş ailə üzvləri və həbsxana yaxınlığında yaşayan qonşular da daxil olmaqla 71 nəfər şəhid olub.”
O, daha əvvəl hücum nəticəsində həbsxananın inzibati binasının bir hissəsinin zədələndiyini və çoxsaylı itkilərin olduğunu bildirmişdi. Məhkəmə idarəsi sağ qalan məhbusların Tehran əyalətinin digər həbsxanalarına köçürüldüyünü əlavə edib.
Evin həbsxanasında Nobel Sülh Mükafatı laureatı Nərgiz Məhəmmədi də daxil olmaqla tanınmış siyasi məhbuslar saxlanılıb.
Məhkəmənin məlumatına görə, həbsxananın tibb mərkəzi və görüş otaqları da hücumda hədəfə alınıb.
Bazar günü İran Silahlı Qüvvələrinin Baş Qərargah rəisi Əbdürrəhim Musəvi dövlət televiziyasına deyib ki, Tehran İsrailin atəşkəs öhdəliklərinə əməl edəcəyinə inanmır: “Biz müharibəni başlamadıq, amma təcavüzkara bütün gücümüzlə cavab verdik. Düşmənin, o cümlədən atəşkəslə bağlı öhdəliklərinə əməl edəcəyinə ciddi şübhəmiz var və yenidən hücuma məruz qalsaq, güclə cavab verməyə hazırıq.”
Əlaqədar xəbərlər
