İngiltərənin xarici işlər naziri çıxışında bildirib ki, İsrailin yaşayış məntəqələrini genişləndirməsi beynəlxalq hüququn pozulmasıdır.
Qafqaz Times xəbər saytının məlumata görə, İngiltərənin xarici işlər naziri Deyvid Lammi bu gün, çərşənbə axşamı, Londondan sionist rejimə verilən yardımlara toxunmadan, populist mövqe sərgiləyərək iddia edib: “Biz Qəzzada 60 günlük deyil, daimi atəşkəsin tərəfdarıyıq! Əgər Qəzza zolağında dözülməz vəziyyət davam etsə, London İsrailə qarşı əlavə tədbirlər görəcək. Biz qarşıdakı həftələrdə Qəzzada atəşkəsə nail olmalıyıq.”
İngiltərə xarici işlər naziri əlavə edib: “Qəzza üçün hazırlanan yeni yardım paylanma planı tamamilə qəbuledilməzdir və insanlar yardım gözləyərkən həyatlarını itirirlər. Əgər biz Qəzzada yardım məsələsini həll etmək istəyiriksə, BMT və onun agentlikləri bu işdə rol oynamalıdır.”
Deyvid Lammi, İsrailin yaşayış məntəqələrini genişləndirməsinin beynəlxalq hüququn pozulması olduğunu da etiraf edib.
Bundan əvvəl, BMT-nin Fələstinli Qaçqınlara Yardım və İş Təşkilatı (UNRWA) üzrə komissarı Filip Lazarin vurğulamışdı ki, hər gün sionist rejimin və onunla əməkdaşlıq edən özəl təhlükəsizlik şirkətlərinin nəzarətində olan yardım paylama məntəqələrində onlarca insanın öldürülməsi və yaralanması ilə bağlı hesabatlar daxil olur.
Onun sözlərinə görə, bu alçaldıcı sistem minlərlə ac və ehtiyac içində olan insanı kilometrlərlə piyada yol getməyə məcbur edir və eyni zamanda, ən zəif təbəqələr və ucqar bölgələrin sakinləri bu prosesdən tamamilə kənarlaşdırılıb.
O, xəbərdarlıq etmişdi ki, bu sistemin məqsədi aclığı aradan qaldırmaq deyil və yardımların təhlükəsiz və geniş şəkildə paylanmasını təmin etməyin yeganə yolu bu prosesi tam şəkildə BMT-yə, o cümlədən UNRWA-ya həvalə etməkdir. Bu qurumun müvafiq təcrübəsi, bilik və yerli icmanın etimadı mövcuddur.