Fələstin İslam Müqavimət Hərəkatı (HƏMAS) verdiyi bəyanatda qaçqınların çadırlarını və oraya sığınmış günahsız mülki şəxsləri hədəf almağın və onları diri-diri yandırmağın vəhşicəsinə və yeni bir cinayət olduğunu vurğulayıb. Bu hadisə cinayətkar müharibə kabinetinə rəhbərlik edən Benyamin Netanyahunun faşist mahiyyətini üzə çıxarır və bütün insan hüquqlarının, qanunların və beynəlxalq normaların açıq şəkildə pozulmasıdır.
Fələstin İslam Müqavimət Hərəkatı (HƏMAS) bəyanatında bildirib ki, işğalçı sionist ordusuna məxsus döyüş təyyarələrinin Xan Yunusun qərbində yerləşən əl-Məvasi bölgəsindəki qaçqın çadırlarını hədəf alan vəhşicəsinə hava hücumları nəticəsində əksəriyyəti uşaq olmaqla 20-dən çox insan şəhid olub və 100-dən çox insan isə yaralanıb.
HƏMAS bu bəyanatında ABŞ-ın işğalçı rejimə dəstək roluna toxunaraq vurğulayıb: ABŞ hökuməti işğalçı terror rejiminə siyasi və hərbi dəstək verməklə, Qəzzə zolağında uşaqlar, qadınlar və qocalar da daxil olmaqla, günahsız mülki vətəndaşlara qarşı bu dəli vəhşiliyin birbaşa məsuliyyətini daşıyır.
Bəyanatın davamında HƏMAS BMT-nin, ona bağlı qurumların və dünya ölkələrinin bu vəhşi cinayətlər və işğalçı ordunun və onun faşist hökumətinin həyata keçirdiyi müharibə qanunlarının misilsiz şəkildə pozulması qarşısında susqun və aciz qalmasını sərt şəkildə qınayıb.
HƏMAS hərəkatı bəyanatının sonunda bir daha ərəb və İslam ölkələrinə müraciət edərək onlardan məsuliyyətlərini qəbul edib, bu davam edən qətliam və soyqırımın dayandırılması üçün dərhal müdaxilə etmələrini, həmçinin Fələstin xalqına yardım göstərmək və onların öz torpaqlarında möhkəm dayanması üçün zəruri ehtiyaclarını təmin etməyə yönəlik təsirli və təcili tədbirlər görmələrini tələb edib.
Xəbər mənbələri bir neçə saat əvvəl bildiriblər ki, sionist rejim özünün sonuncu cinayətində Qəzzə zolağının cənubunda fələstinli köçkünlərin çadırlarını bombalayıb. Bu cinayətdə indiyədək 15 fələstinli köçkün şəhid olub.
Həmçinin bu hücum nəticəsində yaralanan onlarla insan Qızıl Xaç xəstəxanasına, Küveyt, İngilis və Nasir Tibb Mərkəzinə aparılıb.
Əlaqədar xəbərlər
