Gəmi Qəzza zolağındakı mühasirəni yarmaq cəhdində olarkən İsrail əsgərləri tərəfindən basqına məruz qaldı
Azadlıq Flotillası Koalisiyası tərəfindən göndərilmiş yardım gəmisi Handala, Qəzzadakı mühasirəni yarmaq və blokadada olan bölgəyə yardım çatdırmaq məqsədilə yola düşdükdən sonra 27 iyul səhəri İsrail qüvvələri tərəfindən Aşdod limanına aparılıb. Gəmi bundan bir gecə əvvəl İsrail qüvvələri tərəfindən qarşısı alınaraq ələ keçirilmişdi.
Handala gəmisinə şənbə gecəsi gec saatlarda İsrail əsgərləri tərəfindən basqın təşkil olunub və gəminin heyəti həbs edilib.
Azadlıq Flotillası Koalisiyası bazar günü X platformasında yaydığı bəyanatda bildirib:
“İsrail qüvvələri beynəlxalq sularda ‘Handala’ gəmisinə qanunsuz olaraq basqın edərək 21 silahsız mülki şəxsi oğurlayıb. Hökumətinizdən tələb edin ki, İsrailin müharibə cinayətlərinə şərikliyə son versin, humanitar yardımın maneəsiz şəkildə çatdırılmasını təmin etsin və gəmi heyətinin dərhal azad olunması üçün çağırış etsin.”
Gəmidə Avstraliya, Fransa, Böyük Britaniya və ABŞ da daxil olmaqla dünyanın müxtəlif ölkələrindən təxminən 19 fəal və 2 jurnalist olub.
Gəmidə iki Əl-Cəzirə jurnalisti, Fransa Milli Assambleyasının üzvü Qabrielle Katala, həmçinin Fransalı siyasətçi və Avropa Parlamentinin deputatı Emma Furo da olub.
İki Avstraliya vətəndaşı jurnalist Tania Safi və insan haqları müdafiəçisi Robert Martin olub.
Azadlıq Flotillası Koalisiyasının idarə heyətinin üzvü Ann Wright bildirib ki, İsrailin “beynəlxalq mülki şəxsləri saxlayacaq heç bir hüquqi səlahiyyəti yoxdur.”
“Olay İsrailin daxili yurisdiksiyasına aid deyil. Bu şəxslər beynəlxalq hüquq çərçivəsində, beynəlxalq sularda fəaliyyət göstərən xarici vətəndaşlardır. Onların saxlanılması əsassız, qeyri-qanuni və dərhal dayandırılmalıdır,” – deyə o əlavə edib.
Video görüntülərdə Naci əl-Əli tərəfindən yaradılmış məşhur fələstinli karikatura personajı Handala-nın adını daşıyan gəminin 26 iyul gecəsi İsrail əsgərləri tərəfindən ələ keçirildiyi görünür.
Fəallar silah gücü ilə saxlanılıb və kameralar İsrail qüvvələri tərəfindən söndürülüb.
Adala İnsan Haqları Mərkəzi bildirib ki, Təl-Əviv Handala gəmisinin saxlanılan heyəti ilə vəkillərin əlaqə saxlaması üçün edilən bir neçə müraciəti rədd edib və bununla onların hüquqi yardım almaq imkanını məhdudlaşdırıb.
Mərkəz əlavə edib ki, gəmidə olan şəxslər dinc niyyətli olublar, məqsədləri yalnız Qəzza mühasirəsini yarmaq olub və onların həbs edilməsi beynəlxalq hüququn pozulmasıdır. Bu hadisə Qəzzada İsrailin davam edən blokadası nəticəsində aclığın fəlakətli səviyyəyə çatdığı bir dövrə təsadüf edir. Son bir həftə ərzində uşaqlar da daxil olmaqla onlarla insan aclıqdan həyatını itirib.
Bu, İsrail qüvvələri tərəfindən son bir ayda ələ keçirilən ikinci Azadlıq Flotillası Koalisiyası gəmisidir.
İsrail qüvvələri 9 iyun tarixində Qəzza Azadlıq Flotillasına məxsus Madleen gəmisini beynəlxalq sularda ələ keçirib. Gəmi Qəzzaya yaxınlaşaraq mühasirəni yarmağa çalışarkən saxlanılıb və göyərtədəki 12 fəal həbs olunub.
Gəmidə isveçli aktivist Greta Tunberq və fransız-fələstinli siyasətçi, Avropa Parlamentinin üzvü Rima Həsən də olub.
Bu ilin may ayında isə İsrailə məxsus pilotsuz uçuş aparatı Qəzzaya yardım aparan Azadlıq Flotillasının başqa bir gəmisini bombalayaraq gövdəsində deşik açıb, yanğına səbəb olub və gəmini batma təhlükəsi ilə üz-üzə qoyub.
2010-cu ildə İsrail komandosları Azadlıq Flotillasının bir neçə gəmisinə vertolyotlarla hücum edərək onları ələ keçirib. Gəmilər yardım daşıyır və Qəzza mühasirəsini yarmaq üçün yola çıxmışdı. Komandolar hücum zamanı doqquz türk mülki vətəndaşı öldürüb, müxtəlif millətlərdən olan 30 nəfəri isə yaralayıb.
Əlaqədar xəbərlər
