İşğalçı İsrail ordusu səhər saatlarında Qəzzənin şimalında yerləşən Cəbaliya düşərgəsindəki bir neçə yaşayış mənzilini bombalayıb və bu cinayətlər onlarla şəhid və yaralı ilə nəticələnib.
İki həftə öncədən Qəzzənin şimalındakı Cəbaliya düşərgəsini güclü mühasirəyə alan işğalçı İsrail ordusu cümə günü axşam və bugün səhər bir neçə yaşayış mənzilini ağır şəkildə bombalayıb.
Qəzzədəki Dövlət İnformasiya İdarəsinin məlumatına əsasən, 21-i qadın və uşaq olmaqla, 33 nəfər şəhid olub və 70-dən çox insan isə yaralanıb.
Məlumatda qeyd edilib ki, şəhidlərin sayının 50 nəfərə çatmaq ehtimalı var. Çünki bir çoxları hələ də dağıntılar altındadır. Həmçinin yaralıların 85%-nin vəziyyətinin ağır olduğu bildirilib.
Qəzzə Səhiyyə Nazirliyi də cümə günündən bəri 45-i Cəbaliya düşərgəsindən olmaqla, 64 nəfərin şəhid olduğunu açıqlayıb.
Fələstin mənbələrinin verdiyi məlumata əsasən, iki həftədir ki, işğalçı İsrail ordusu bu düşərgəni mühasirəyə alıb və Qəzzənin şimalına, xüsusən də Cəbaliya düşərgəsinə hava və quru hücumlarını şiddətləndirib.
Eyni zamanda buraya su, qida, dərman və yanacağın daxil olması məhdudlaşdırılıb, rabitə şəbəkələri və internet də kəsilib.
Müşahidə etdiyiniz aşağıdakı video Cəbaliya düşərgəsindəki “əl-Ovdə” xəstəxanasının ərazisinə aiddir və yarı aktiv halda olan xəstəxananın dəhlizlərində çoxlu şəhid cənazlərinin olduğunu göstərir.
Ötən bir ildən çox vaxt ərzində Cəbaliya düşərgəsi dəfələrlə işğalçı ordunun hücumlarına məruz qalıb. Amma hər dəfə fələstinli döyüşçülər hücumlar bitdikdən sonra düşərgənin nəzarətini ələ alıblar. Hətta bir çox israilli analitiklər bu düşərgədə döyüşlərin davam etməsinin faydasız olduğunu qeyd ediblər.