Digər tərəfdən, BMT-nin yüksək səviyyəli rəsmiləri çərşənbə günü keçirilən Təcili Təhlükəsizlik Şurası iclasında Qəzzadakı vəziyyəti “ifadəolunmaz dağıntı səviyyəsi” kimi qiymətləndirib və bildirib ki, uşaqlar “ən ağır bədəl ödəyirlər”.
Aclıq, çökmüş səhiyyə sistemi və İsrailin davam edən bombalamaları fonunda BMT-nin fövqəladə yardım koordinatoru Tom Fletcher deyib: “Artıq yerindəki vəziyyəti təsvir etməyə söz qalmayıb.”
BMT-nin Uşaq Fövqəladə Yardım Fondu isə bildirib ki, Qəzzada hər gün orta hesabla 28 uşaq öldürülür – “bu, tam bir sinif otağına bərabərdir.”
Təşkilatın rəhbəri Ketrin Rassel deyib: “Bir anlığa düşünün – hər gün bir sinif dolusu uşaq qətlə yetirilir. Bu uşaqlar döyüşçü deyillər. Onlar həyat qurtaran qida və dərman üçün növbəyə durduqları yerdə öldürülür və şikəst edilirlər.”
Bu həftənin əvvəlində Qəzzadakı səhiyyə rəsmiləri bildirib ki, bir su paylama məntəqəsinə edilən hava hücumu nəticəsində yeddi uşaq şəhid olub.
Bu cür hücumlar Qəzza zolağında adi hal alıb. Keçən həftə baş vermiş bir digər hücum nəticəsində ərzaq yardımı gözləyən bir neçə uşaq və qadın şəhid olmuşdu.
Eyni zamanda, çərşənbə günü İsrail və ABŞ-ın dəstəklədiyi Qəzza Humanitar Fondunun (GHF) keçid məntəqəsində yardım gözləyən insanlar arasında izdiham və gözyaşardıcı qaz səbəbindən çoxsaylı boğulmalar qeydə alınıb.
Qəzzadakı Hökumət Media İdarəsi bildirib ki, İsrail ordusu aclıqdan əziyyət çəkən fələstinliləri dar metal keçidlərə dolduraraq kimyəvi qaz sıxıb. Nəticədə ölən və yaralananlar olub.
Media idarəsi əlavə edib: “Biz həm yerli, həm də beynəlxalq ictimaiyyətə bildiririk ki, bu qurum nə humanitar bir təşkilatdır, nə də yardım fəaliyyətinə dair heç bir peşə və ya etik normalara riayət edir. Bu, əslində, İsrailin maraqlarına xidmət edən təhlükəli bir təhlükəsizlik və kəşfiyyat alətidir və vəhşicəsinə idarə olunur.”
İndiyə qədər GHF məntəqələrində 870-dən çox fələstinli şəhid olub, 5.700-dən çox insan yaralanıb, 46 nəfər isə itkin düşüb.
Ümumi itki sayı isə 58.573 şəhid, 139.607 yaralı ilə qeydə alınıb.