Birləşmiş Millətlər Təşkilatının Fələstin işğal olunmuş ərazilərindəki xüsusi məruzəçisi Françeska Albanese Qəzzada hökm sürən fəlakətli vəziyyəti təsvir etmək üçün heç bir sözün kifayət etmədiyini bildirib və vurğulayıb ki, İsrail bilərəkdən milyonlarla insanı aclığa məhkum edir və uşaqları qətlə yetirir.
Qafqaz Times-ın məlumatına görə, insan hüquqları üzrə BMT xüsusi məruzəçisi Françeska Albanese – sionistlərin Qəzzaya qarşı həyata keçirdiyi soyqırım cinayətləri barədə çoxsaylı sənədlər təqdim etmiş və bu səbəblə ABŞ tərəfindən sanksiyaya məruz qalmış şəxs – son açıqlamasında bəyan edib ki, İsrail bilərəkdən uşaqları öldürür, milyonlarla insanı aclıq içində saxlayır və məqsədi Qəzzada fələstinliləri məhv etməkdir.
Albanese bildirib ki, nasizm dünya tarixində ən böyük şər olub, lakin bu gün bir tərəf var (İsrail rejiminə işarə edərək), hansı ki bilərəkdən milyonlarla insanı aclıq içində saxlayır və uşaqları qətlə yetirir.
Əl-Cəzirə ilə müsahibəsində BMT məruzəçisi deyib:
“Qəzza zolağında baş verənləri təsvir edəcək söz tapmaq mümkün deyil. Burada aclıq və səfalət ən yüksək həddə çatıb. Beynəlxalq ictimaiyyət isə İsrailə mükafat verir. İsrail fələstinlilərə qarşı soyqırımı davam etdirdiyi bir vaxtda biz ‘iki dövlətli həll’ haqqında danışa bilmərik.”
O əlavə edib:
“Qəzza faciəvi bir reallıqda yaşayır və dünyanın hərəkətsizliyi səbəbilə uşaq qəbiristanlığına çevrilib. Yardımların qarşısını alan blokada və sərt məhdudiyyətlər Qəzzada ölüm hallarının artmasına səbəb olub. Biz bu böyük fəlakətin dayandırılmasını tələb edirik.”
Albanese həmçinin ABŞ və İsraili sərt şəkildə tənqid edərək deyib:
“Amerika və İsrail Qəzzaya ərzaq yardımını belə zorakılığa əsaslanan mexanizmlə paylayırlar. Bu, cinayətkar bir layihədir və heç kim onlara qarşı çıxmır.”
O, Qəzzada aclıqdan həyatını itirən əlil bir uşağın ölümünə toxunaraq deyib:
“Bizim nəsil nasizmin ən böyük şər olduğuna inandırılıb. Amma bu gün İsrail adlanan bir tərəf var ki, bilərəkdən milyonlarla insanı ac saxlayır və uşaqları qətlə yetirir.”
UNICEF-in regional sözçüsü Səlim Uveys də bu məsələ ilə bağlı deyib:
“İsrail, beynəlxalq ictimaiyyətin Qəzzaya yardım çatdırılması ilə bağlı çoxsaylı çağırışlarını rədd edir ki, bu da bugünkü dəhşətli humanitar fəlakətə səbəb olub.”
BMT-nin digər sözçüsü Tom Wilcher isə bildirib ki,
İsrail, fələstinlilərə dəstək verən humanitar təşkilatların rəhbər və əməkdaşlarının vizalarını uzatmır. Qəzzada baş verən fəlakət sözlə ifadə edilə bilməz. Ərzaq tamamilə tükənib, yemək axtaran insanlar atəşə tutulur. İsrail, işğalçı tərəf kimi mülki əhalinin ehtiyaclarını qarşılamaqla bağlı Cenevrə Konvensiyalarından irəli gələn öhdəliklərini pozur.
O əlavə edib ki, İsrail BMT-nin Fələstinli Qaçqınlara Yardım Agentliyi – UNRWA-nın fəaliyyətini də qadağan edib və bu agentliyin rəhbəri Filip Lazzariniyə Qəzzaya daxil olmaq icazəsi verilmir.
Əlaqədar xəbərlər
