Belçika xəbər agentliyinin məlumatına görə, Brüsseldə bir məhkəmə 17 iyul – cümə axşamı – Flandriya regional hökumətinə İsrail işğalçı ordusuna hərbi təchizat daşımalarının dərhal dayandırılması barədə qərar çıxarıb.
Bundan əvvəl dörd belçikalı insan haqları təşkilatı Flandriya hökumətinə qarşı təcili məhkəmə iddiası qaldıraraq, İsrail ordusu üçün hərbi təyinatlı avadanlıq istehsalında istifadə ediləcək komponentlərlə dolu bir konteynerin göndərilməsinin qarşısını almağı tələb etmişdi.
Təşkilatlar, strateji mallara nəzarət agentliyinin yoxlama proseslərindəki ləngliyi sərt şəkildə tənqid edərək, hökumətin hərbi məqsədli məhsulların ixracına dair qaydaları qəsdən pozduğunu bildirmişdi.
Flandriya hökumətinin baş naziri Metyas Döpendeleynin ofisi bu iddialara cavab olaraq bildirib ki, konteyner araşdırma bitənədək limanda saxlanılacaq. Amma hüquq-müdafiə təşkilatları bu cavabı “qənaətbəxş hesab etməyib”.
Mətbuat açıqlamasında bu təşkilatlar bəyan ediblər: “Bu komponentlərin hərbi məqsədli olduğu açıq-aşkardır və bu yük dərhal dayandırılmalıdır.” Onların sözlərinə görə, Qəzzada davam edən soyqırımı şəraitində İsrailə hərbi təchizatın ötürülməsi Soyqırımın Qarşısının Alınması Konvensiyasının pozulmasıdır və bu konvensiya bütün dövlətlərə soyqırımı önləmək üçün tədbir görmək öhdəliyi qoyur.
Bu ayın əvvəlində diqqətlər Belçikanın şimalında yerləşən Antverpen-Brügge limanına yönəldi. Burada İsrailin tank və zirehli texnikalarının istehsalında istifadə edilən komponentlərin olduğu şübhəli yük saxlanılmışdı.
Məlumata görə, dünyanın ən böyük limanlarından biri hesab edilən bu məkandakı “Doerkaank” terminalında dayandırılan yükdə “silindrik podşipniklər” (yüksək dəqiqlikli rulmanlar) var. Bu hissələr “Merkava” tankları və “Namer” zirehli maşınlarının ötürmə sistemlərində istifadə olunur və Fransada ABŞ-ın “Timken” şirkəti tərəfindən istehsal edilib. Onlar İsrail ordusu ilə müqaviləli olan “Ashot Ashkelon” zavoduna göndərilməli idi.
İyulun 2-də “Vredesactie”, “Intal” və “İnsan Hüquqları Liqası” kimi aparıcı Belçika hüquq müdafiə təşkilatları Flandriya hökumətinə rəsmi xəbərdarlıq məktubu göndərərək, bu yüklərin göndərilməsinin qarşısını almağı tələb ediblər. Onlar bildiriblər ki, bu tip ötürmələr Belçika və beynəlxalq silah ticarəti qanunlarının pozulması deməkdir.
Belçikanın Baş nazir müavini və xarici işlər naziri Maksim Prevo ötən ay açıqlama verərək, ölkəsinin İsraillə bağlı ritorikanı sərtləşdirdiyini bildirib və Qəzzadakı hərbi əməliyyatların “özünümüdafiə” anlayışı ilə əlaqəsinin olmadığını vurğulayıb.
Qeyd edək ki, Flandriya hökuməti Belçikanın üç əsas icmasından biri olan flamand icmasını təmsil edir. Digər iki icma isə frankofon Valon-Brüssel və almandilli icmalardır.
Əlaqədar xəbərlər
